Atentati ndaj biznesmenit Ardian Gjeloshi në Kurbin ku mbeti i plagosur ky i fundit dhe vdiq punonjësi i tij Selman Mihana, dyshohet të jetë kryer nga vrasës me pagesë. 3 janë pistat ku po hetohet, e më kryesorja mbetet një masakër e vitit 2002 ku mbeti e vrarë një infermiere e u plagosën 3 të tjerë. Disa persona janë shoqëruar por për asnjërin nuk ka ndalim, teksa autorët janë kujdesur të mos lënë gjurmë pas.
Atentati me një viktimë e një të plagosur të shtunën në Gurëz të Kurbinit dyshohet të jetë kryer nga vrasës me pagesë. Ky është dyshimi i arsyeshëm që ka grupi hetimor që po heton ngjarjen, në përbërje të të cilit ka ekspertë të krimit nga Policia e Shtetit.
Mbi 10 persona janë shoqëruar për t’u marrë në pyetje, për plagosjen e biznesmenit të inerteve Ardian Gjeloshi dhe vrasjen e punonjësit të tij Selman Mihana, ndërsa pavarësisht dyshimeve që mund të ngrihen asnjë person nuk është ndaluar deri tani. Pamjet nga kamerat e sigurisë që ende po vëzhgohen tregojnë se kanë qenë dy persona të veshur me të zeza që kanë hyrë në ambientet e biznesit duke kapërcyer rrethimin dhe kanë hapur zjarr menjëherë në drejtim të viktimës dhe të plagosurit. Nuk përjashtohet mundësia që ata para, gjatë dhe pas krimit të jenë ndihmuar nga persona të tjerë teksa janë larguar në drejtim të zonës së Fushë-Kuqes, për të humbur gjurmët.
20- gëzhoja u zbrazën nga kallashnikovi, dy prej të cilave kapën shënjestrën duke e lënë të plagosur, ndërsa I morën jetën punonjësit të tij. Tri janë pistat ku po heton prokuroria që kishte në shënjestër Ardian Gjeloshin janë konfliktet për shkak të biznesit, hakmarrjen për shkak të një krimi të rëndë në vitin 2002 dhe një ngjarje të disa kohëve më parë ku i biri i Ardian Gjeloshit mbeti I plagosur.
Lidhur me pistën e parë, konflikti erdhi me anëtarët e një fisi nga zona e Pllanës për çështje biznesi.
Ndërkohë që dyshimet kryesore mbeten tek ngjarja e vitit 2002 ku autor i dyshuar ishte Dritan Gjeloshi, vëllai i Ardian Gjeloshit, i cili në atë kohë kishte mosmarrëveshje me oficerin e policisë Kastriot Prengaj.
Autorët qëlluan mbi një kamionçinë dhe lanë të vrarë Marie Prengën, infermiere, nënë e 4 fëmijëve, ndërsa u plagos oficeri i FNSH Kastriot Prenga si dhe Gjergj e Vitore Prenga.