“Pëllumbat, kuajt dhe publiku ishin fati i Vllaznisë sot. Çdo fitore është e mirë, por kjo ndaj një ekipi siç është Tirana ka një vlerë të veçantë. Në pjesën e parë ishim mirë, shumë luftarakë e dominuam, u pozicionuam. Në pjesën e dytë u pozionuam tepër dhe kundërshtari ndryshoi sistemin e lojës, por nuk na rrezikuan përveç në momentin që morëm golin”. Qatip Osmani dhe Vllaznia e tij udhëtojnë me 100 në orë dhe nuk duken të ndalshëm nga askush. Tani kreu është edhe më afër e të mendosh se 13 javë përpara ishin jo vetëm jashtë Final Four, por edhe në rrezik për mbijetesën.
Osmani tani ka vetëm një detyrë, të kontrollojë euforinë e skuadrës, duke qenë se ka edhe 10 javë deri në fund, përpara betejave të Final Four: “Jo veç para kësaj loje, por edhe para mundohemi ta menaxhojmë këtë euforinë, duhet të jemi të kujdesshëm. Ishalla asnjëra nga skuadrat s’na mund, por nuk e di”, tha Osmani.
FAGU: “VLLAZNIA DOMINOI SE E LEJUAM NE”
“Ishin gabime individuale ndoshta presioni i tepërt, për këtë na vjen më keq, Vllaznia dominoi se e lejuam ne, kjo ishte e vetmja gjë. Ndryshuam vendosjen taktike në pjesën e dytë ishim më ofensivë, por Vllaznia kishte rezultatin në favor”. Erbim Fagu është nonsens në shpjegimin që jep, duke fajësuar ndoshta lojtarët e tij, për faktin se nuk kanë ndjekur udhëzimet e tij. Tekniku humbi ndeshjen e parë në pankinën bardheblu, në 3 ndeshje në detyrë, por në Shkodër skuadra e tij tregoi gjithë limitet e saj. “Futbolli është lojë gabimesh dhe ata që bëjnë më pak gabime fitojnë ndeshjen. Ne na vjen keq që i bëjmë të tilla, por do ti rregullojmë në të ardhmen, është thjeshtë çështje besimi”.
Lexo më tej: Video/ Vllaznia tris në Klasike, dërrmohet Tirana: Balaj një lider, Hoxhallari katastrofik
Fagu u ndal edhe te Patrick që u fut me lojën në vazhdim, por tregoi se ishte lojtari më i rrezikshëm i Tiranës: “Patrik është lojtar i rëndësishëm i skuadrës por kjo është zgjidhje e thjesht taktike dhe asgjë më tepër. Kampionati ka akoma ndeshje, për ne është e rëndësishme të rikthehemi kjo Tirana e pjesës së dytë me besim”. Në fund, historia e habitshme e kapitenit Najdovski, që fshihet përmes dëmimit, vazhdon: “Nuk është akoma gati pas një vizite tjetër mjekësore që bëri”.