Dule: Belerit i ofruan marrëveshje, del nga burgu po dhe dorëheqjen

Vangjel Dule, Kreu i PBDNJ-së ka folur mbrëmjen e së enjtes për çështjen “Beleri”. I ftuar në Syri Tv ai ka dhënë disa detaje që më parë kanë qenë të panjohura për opinionin publik. Sipas tij, Belerit i kanë ofruar një marrëveshje në burg, ku i thanë që “nëse do të dalësh, duhet të japësh dorëheqjen”.

“Duhet ta qartësojmë situatën dhe të themi të vërtetat siç duhet. Beleri është në burg sepse është Kryetari i Bashkisë së Himarës. Belerit i është ofruar marrëveshje e pisët brenda në burg. I kanë thënë që “nëse do të dalësh jep dorëheqjen nga Kryetari Bashkisë”. Pra problemi është me Belerin si kryebashkiak nga Edi Rama. Rama ka problemin e platformës së tij politike” – tha Dule.

Ai akuzoi kryeministrin Edi Rama se ndërhyri brutalisht në procesin zgjedhor për Bashkinë e Himarës, duke urdhëruar arrestimin e kandidatit të opozitës. Sipas Dules, pavarësisht se “në gjykatë u vërtetua katërcipërisht se zoti Beleri nuk është i implikuar në asnjë çast dhe në asnjë moment të fushatës elektorale, në asnjë korrupsion dhe në asnjë shit-blerje vote dhe u rrëzua çdo pretendim i akuzës, vendimi i gjykatës do të shënohet në analet e historisë së jurisprodencës si një moment i absurditeti ligjor. 

Procesi zgjedhor në Himarë nuk u kontestua në asnjë moment, as nga rivali i zotit Beleri, as nga partia të cilën përfaqësonte, si në komisionin zgjedhor të zonës, si në KQZ ashtu dhe në Kolegjin Zgjedhor dhe për çudi dëgjova sot se ai ishte një proces i manipuluar, një proces i pakontestuar në asnjë prej shkallëve të parashikuara nga ligji, është një proces i cili ka miratimin e të gjithëve.

Atë që nuk mund të ketë është ndërhyrja brutale e zotit Rama me arrestimin arbitrar me ndërhyrjet në proces, por që nuk i dha në asnjë moment që të ketë edhe rezultatin e dëshiruar në Bashkinë e Himarës. Bashkia e Himarës ka zgjedhur kryetar bashkie” – tha Dule. ©LAPSI.al