Pas katërmbëdhjetë muajsh e pesë ditësh burg, Dani Alves u lirua sot nga burgu i Brians 2. Liria e brazilianit u arrit vetëm duke paguar garancinë prej 1 milion euro, siç vendosi të martën e kaluar Gjykata e Barcelonës. E shoqëroi në hapat e para drejt lirisë avokatja e tij Ines Guardiola. I dënuar me 4 vjet e gjashtë muaj burg në shkallën e parë për përdhunimin e një gruaje në klubin e natës Sutton në Barcelonë (ishte 30 dhjetor 2022), ish-mbrojtësi i krahut do të presë tashmë përfundimin e gjyqit larg hekurave.
Dani Alves, llogaritë e të cilit ishin ngrirë (ndaj lindi nevoja për t’i kërkuar paratë te Neymar), iu hoqën dy pasaportat dhe për këtë arsye iu ndalua të largohej nga territori spanjoll. 40-vjeçari duhet të qëndrojë edhe larg viktimës dhe të paraqitet në gjykatë çdo javë, saktësisht çdo të premte.
Lexo më tej: Barcelona fshin nga historia Dani Alves: vendim drastik i klubit, e konsideron “përdhunues”
GARANCINË E PAGUAN NEYMAR
Dani Alves pritej të dilte nga burgu të enjten, por u përshpejtua koha pasi u pagua garancia prej një milion eurosh. Një shifër të cilën sërish sipas La Vanguardia ia ka dhënë Neymar, ish-shoku i skuadrës te Barça, PSG dhe kombëtarja e Brazilit. Në detaje për pagesën u kujdes babai i sulmuesit të Al Hilal. Duke e rikthyer pak historinë, kujtojmë se Dani Alves tashmë i ishte drejtuar familjes së Neymar për të paguar 150 mijë eurot e kërkuara nga gjyqtari hetues si dëmshpërblim për viktimën e dhunës seksuale. Paratë kanë shërbyer edhe si një faktor lehtësues për uljen e dënimit në katër vjet e gjysmë.