Donald Trump kërcënoi se do të dërgojë ushtrinë për të mbyllur kufirin jugor të Shteteve të Bashkuara, nëse Meksika nuk ndalon emigrimin e mijëra emigrantëve që synojnë të hyjnë në SHBA.
Çështja e emigracionit pritet të diskutohet në Mexico City gjatë takimit të Sekretarit amerikan i Shtetit, Mike Pompeo, me Presidentin meksikan në largim, Pena Nieto.
Vetëm pak javë larg zgjedhjeve për Kongresin, Presidenti Trump u tha mbështetësve gjatë një tubimi në Montana se fajin e kanë demokratët për valën e emigracionit të paligjshëm.
Meksika dërgoi dje qindra policë shtesë në kufirin e saj me Guatemalën. Presidenti Trump pretendon se ka kriminelë mes gati 3 mijë hondurasve që udhëtojnë përmes Guatemalas, drejt Meksikës dhe rrjedhimisht drejt Shteteve të Bashkuara. Presidenti Trump kërcënon të ndërpresë ndihmat për Hondurasin, nëse nuk ndalen emigrantët, shkruan Zëri i Amerikës.
Shumë prej njerëzve që po përpiqen të arrijnë Shtetet e Bashkuara, po u largohen kërcënimeve të përditshme në jetët e tyre dhe influencës së bandave tek fëmijët e tyre.