Kryeministri i Republikës së Kosovës, Ramush Haradinaj, ka nisur vizitën e tij zyrtare njëditore në Berlin, ku do të zhvillojë një takim me kancelaren gjermane, Angela Merkel. Ashtu sikurse ka deklaruar Haradinaj, takimi ka për qëllim thellimin e mëtejshëm të marrëdhënieve dypalëshe.
“Bashkëpunimi i bazuar në besim është i domosdoshëm në rrugëtimin e Kosovës për zhvillim ekonomik, integrime evropiane dhe në fushën e sigurisë. Gjermania vazhdon të jetë një ndër partnerët kryesorë të Kosovës dhe përkrahja e tyre është jetike në arritjen e objektivave tona të përbashkëta”, është shprehur Haradinaj për mediat në paraprirje të vizitës së tij në Gjermani.
Krahas kancelares Merkel, Haradinaj pritet të takojë edhe kryetarin e Bundestagut, Wolfgang Schauble, si edhe deputetë të të gjitha grupeve parlamentare. Në agjendën e vizitës është parashikuar edhe pjesëmarrja e tij në konferencën “Takimet ndërkombëtare” dhe në lutjet e mëngjesit në Berlin.
Sipas një artikulli të publikuar nga prestigjozja gjermane “Deutche Welle”, Merkel do të shtrojë në tryezën e bisedimeve çështjen taksës prej 100 % ndaj mallrave me origjinë serbe, për t’i kërkuar Haradinajt pezullimin e kësaj mase me synim normalizimin e marrëdhënieve dhe rivendosjen e dialogut me Serbinë.
Ndërkaq, Haradinaj ka shprehur në vazhdimësi vendosmërinë për mbajtjen në fuqi të taksës deri në njohjen reciproke me Serbinë