Rreth 100 punonjës policie do t’i nënshtrohen një procesi verifikimi, pasi dyshohet se kanë nxjerrë të dhëna nga sistemi TIMS mbi Santjago Malkon, 26 vjeç, që mbeti viktimë e një atentati mafioz në Tiranë pak ditë më parë.
Drejtoria e Standardeve në Policinë e Shtetit ka nisur verifikimin për punonjësit që janë identifikuar përmes përdorimit të një kodi sigurie të veçantë pasi kanë kërkuar të dhëna në sistemin TIMS për ish-policin Malko.
Sipas ligjit, asnjë punonjës policie nuk mund të nxjerrë apo të kërkojë të dhëna nga sistemi TIMS, nëse nuk është i ngarkuar drejtpërdrejtë me hetimin e një çështjeje të caktuar.
Drejtuesit e policisë dyshojnë se fotoja e Malkos që është bërë publike në media, ka dalë nga sistemi TIMS. Në këtë rast, verfikimi motivohet edhe nga publikimi i të dhënave sensitive që kanë cënuar figurën e viktimës.
Malko u ekzekutua me breshëri kallashnikovi mbrëmjen e 28 gushtit në zonën e Xhamllikut në kryeqytet.
26-vjeçari” ishte pjesë e bandës së Ervis Martinajt, i njohur ndryshe si “bosi” i lojërave të fatit. Malko ka qenë i përfshirë në ngjarjen e 4 tetorit të 2018-s, kur ndodhi vrasja e Fabian Gaxhës në zonën e ish-Bllokut, pas një përplasjeje me armë.
Gjithashtu, ish-polici i vrarë është përfshirë në një sherr me dy vëllezërit Lashi në vitin 2016 për një borxh prej 1 mijë eurosh.
Malko kishte përfunduar kursin për Patrullë të Përgjithshme dhe ka qenë pjesë e kësaj strukture në Policinë e Tiranës vetëm për 3 muaj, nga ku u tërhoq vullnetarisht.