Koha e përgatitjeve ka përfunduar: stërvitjet dhe strategjitë tashmë ia lënë vendin 90 minutave në Stade de France. Shqipëria ka zhvilluar edhe stërvitjen e fundit, përpara ndeshjes me Francën, në të cilën tekniku Edy Reja ka insistuar sërisht në aspektin difensiv, duke u kujdesur për mënyrën e impostimit sidomos në goditjet standarte. Do të jetë një ndeshje e vështirë, ashtu sikurse është e qartë e ku shanset, edhe sipas mendimit të ish-lojtarit të kombëtares dhe PSG, Edvin Murati, janë të vogla: “Për të bërë rrëmujë, bëjmë rrëmujë. Franca kampion bote, është mega favorti. Çunat do luftojnë, ndeshje e bukur, nuk kemi çfarë të humbim. Shanset do të jenë të vogla”.
Cikalleshi që një ditë më parë ka ndjerë dhimbje të forta në kavilje është shfaqur më i qetë, duke punuar bashkë me pjesën tjetër të skuadrës, ndërkohë që me dëmtimet të shmangura, Reja tashmë ka vetëm vështirësinë e zgjedhjes. Me 6 pikë Shqipëria kërkon të bëjë befasinë, duke kujtuar misionin që përmbushi në këtë fushatë eleminatoresh Turqia, për më tepër që Franca këtë herë vjen me mungesa të rëndësishme.