Rama tek familja Rasha/ A do të ndryshojë akuza për Nevaldo Hajdërajn?

Kryeministri Edi Rama ka vizituar mëngjesin e së martës, për herë të tretë, familjen Rasha në kryeqytet.

Pas përfundimit të vizitës, kryeministri Rama nuk pranoi që të fliste për gazetarët në lidhje më motivet e vizitës së tij të radhës.

As vëllezërit e 25-vjeçarit të ndjerë Klodian Rasha nuk pranuan të flisnin për kamerat por sipas ABCNEWS ata janë shprehur se nuk kanë nevojë për pension dhe se paratë që do të marrin, do t’i japin për bamirësi.

Vëllezërit e të riut kanë thënë se “për dy ditë do ta marrni vesh nga prokuroria që nuk është vrasje aksidentale, por vrasje me dashje”.

Akuza që u ngrit ndaj policit Nevaldo Hajdërajn u caktua nga oficeri i policisë gjyqësore që ishte në terren dhe u bë e ditur nga prokuroria. Sipas avokatit të Hajdërajt, me këtë akuzë polici del nga burgu menjëherë në përfundim të procesit gjyqësor. Prokuroria mund ta ndryshojë akuzën në “vrasje me dashje” dhe duket se kjo ka qenë pretendimi kryesor i familjes Rasha për të bërë drejtësi për djalin 25 vjeçar.