Nuk ka patur histori ndeshja në Loro Borici dhe Vllaznia rrit marshin në tentativë për tu shkëputur në krye të klasifikimit me 5-1 e fiksuar kundër Skënderbeut, në sfidën e vlefshme për javën e 11 të Superiores. Katër gola të Ardit Hoxhajt, protagonisti absolut i takimit, i japin mundësinë tashmë shkodranëve të jenë + 8 nga vendi i dytë, në pritje të përballjeve të më vonshme.
Një ndeshje që u kuptua që në sekondën e 37 se si do të shkonte, me Imerin që hapi serinë e golave, duke e bërë të thjeshtë për të besuarit e Brdaric. Skuadra e Ahmatajt gaboi shumë në mbrojtje, duke i dhënë mundësinë kuqebluve ti shfrytëzonin. Dy gola të tjerë para pushimit të lojës, që mbajnë firmën e Ardit Hoxhajt likuiduan shpresat e korcarëve për të bërë rezultat në Shkodër. Sulmuesi shënoi golin e dytë në të 35 e të tretin për Vllazninë në të 43.
Hoxhaj nuk u ndal me dygolëshin personal, sepse me rifillimin e lojës realizoi edhe dy herë të tjera në të 53 e të 60, për të kompletuar pokerin e tij dhe shuplakën e Vllaznisë për Skënderbeun, që ‘lëpiu’ plagët me golin e Mensah në të 62, por që ishte krejtësisht i pamjaftueshëm për të shpëtuar fytyrën në një ndeshje për tu harruar. Shkodranët shkojnë në ndeshjen e fundit të 2020 me 25 pikë, në krye të klasifikimit, ndërsa korcarët janë të parafundit dhe shohin Bylis ti largohet.