Pika kufitare e Morinës mes Shqipërisë dhe Kosovës vijon të mbetet më problematikja sa i takon krijimit të radhëve për të kaluar në të dy anët. Këto radhë u krijuan në momentin kur Shqipëria vendosi masa anti-Covid për personat që futen në territorin shqiptar, siç janë paraqitja e çertifikatës së vaksinimit apo ajo e tamponit negativ për Covid 19.
Si rrjedhojë e aplikimit të këtyre masave, radha e autoveturave, autobusëve dhe kamionëve që duan të futen në vendin tonë ka qenë kilometrike në brendësi të territorit të Kosovës. Qytetarët shprehen të indinjuar për situatën e krijuar.