Autoritetet italiane kanë pezulluar gjithsej 17 profile mesazhesh publike dhe private që reklamonin shitjen e çertifikatave të paligjshme të vaksinimit për COVID-19, tha të hënën Policia Financiare e Italisë. Autoritetet që monitorojnë internetin, identifikuan nëntë profile private dhe tetë kanale publike që ofronin “Green Passes” false si në format dixhital ashtu edhe në letër. Çmimet e çertifikatave shëndetësore varionin nga 100 euro deri në 500 euro, me zbritje të ofruara për ata që blenin çertifikata të shumta si “paketë familjare”. Në disa raste, “Green Pass” mund të paguhet me kriptovaluta, sipas zyrtarëve që hetuan rastin.
Çertifikatat e rreme dyshohet se përmbanin kode QR “plotësisht të besueshme” për të kaluar kontrollet nga autoritetet kompetente, por afrohej edhe ndihmë në rast të problemeve, siç reklamohet nga shitësit në internet. Zyrtarët italianë gjetën të paktën 140,000 përdorues të lidhur me kanalet e dyshuara, mes një hetimi për të goditur çertifikatat e rreme në të gjithë kontinentin, ndërsa liderët evropianë rritën masat e sigurisë për të trajtuar përhapjen e koronavirusit dhe variantin e ri Omicron. Numri i profileve online që kërkojnë të shesin “Green Passes” falso është rritur së fundmi pasi qeveria italiane e zgjati afatin e çertifikatës për shërbimet e udhëtimit dhe aktivitetet rekreative.