• |
ide | kryesore

Tre hapat drejt paqes, Zelensky kërkon mbështetje nga G7

-Instant, Lajme, Planet


Presidenti ukrainas Volodymyr Zelensky i bëri thirrje G7-ës të hënën (12/12) që të vazhdojë mbështetjen e saj për Ukrainën edhe për vitin e ardhshëm, duke përshkruar tre hapa për të siguruar paqe.

Midis tre hapave janë edhe tërheqja e trupave ruse për këto Krishtlindje.

Më shumë pajisje ushtarake

Zelensky tha se hapi i parë është një “forcë e re”, duke kërkuar më shumë pajisje ushtarake nga G7.

“Rusia ka ende avantazhin në artileri dhe raketa, ky është një fakt”, tha Zelensky në deklaratën e tij.

“Ukraina ka nevojë për tanke moderne dhe unë ju kërkoj që të na siguroni këtë aftësi mbrojtëse. Mund të bëhet pikërisht tani”.

Ai tha gjithashtu se Ukraina ka nevojë për më shumë “pajisje raketash dhe më shumë raketa me rreze të gjatë”, duke shtuar se Ukraina ka nevojë për “mbështetje të vazhdueshme artilerie me armë dhe predha”.

“Sa më efektivë të jemi me armë të tilla, aq më i shkurtër do të jetë agresioni rus”, tha ai.

Mbështetje për stabilitetin ekonomik dhe energjetik

Hapi i dytë, sipas Zelensky, është që udhëheqësit të ruajnë stabilitetin ekonomik, energjetik dhe social në vitin e ardhshëm.

Ai gjithashtu kërkoi nga G7 që të angazhohet për rritjen e ndihmës së gazit për Ukrainën.

Diplomacia e re

Në hapin e tretë dhe të fundit, Zelensky tha se Ukraina do të donte të ofronte një zgjidhje paqësore, duke filluar me kërkesën e Rusisë që të fillojë tërheqjen e trupave këtë Krishtlindje .

“Unë sugjeroj që Rusia të ndërmarrë një hap konkret dhe thelbësor drejt një zgjidhjeje diplomatike , e cila përmendet kaq shpesh nga Moska,” tha ai.

“Shumë shpejt do të kemi festa që do të festohen nga miliarda njerëz”, tha Zelensky.

“Është koha që njerëzit normalë të mendojnë për paqen, jo për agresionin. Unë sugjeroj që Rusia të paktën të përpiqet të provojë se është e aftë të braktisë ofensivën”.
“Nëse Rusia tërheq trupat e saj nga Ukraina, ajo do të sigurojë një ndërprerje të përhershme të armiqësive”, përfundoi Zelensky.

Angazhimi i G7 për të përforcuar ushtarakisht Ukrainën

Nga ana e saj, Grupi i Shtatë vendeve më të fuqishme të industrializuara (G7) ka siguruar se do të bashkëpunojë për të forcuar aftësitë ushtarake të Ukrainës, duke u fokusuar në fazën e parë në sistemet kundërajrore.
Kështu thuhet në komunikatën e liderëve të G7 të publikuar nga Britania.

Udhëheqësit e shtatë vendeve theksuan gjithashtu se “retorika e papërgjegjshme bërthamore” e Rusisë ishte e papranueshme dhe se çdo përdorim i armëve kimike, biologjike ose bërthamore do të kishte pasoja të rënda.

“Ne do të vazhdojmë të koordinojmë përpjekjet për të përmbushur nevojat urgjente të Ukrainës për pajisje ushtarake dhe mbrojtëse”, thuhet në deklaratë.


Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *