Një finale, edhe kur është “e vogël”, mbetet një finale. Kështu, Kroacia e Maroku do të kërkojnë shkallën e fundit të podiumit, në një turne ku kanë dhënë gjithcka. E tregon situata e dëmtimeve te Kroacia, me Dalic që ka në dyshim të fortë Brozovic e Gvardiol. Një rekord e thërret Perisic për një tjetër betejë kundër afrikanëve. Maroku, më shumë se të fitojë ndeshjen, synon të kënaqë të gjithë anëtarët e një grupi që e ka bërë tashmë historinë.
BROZOVIC E GVARDIOL TREMBIN KROACINË
Dëmtimi i Marcelo Brozovic ishte një shuplakë e panevojshme për Kroacinë, në humbjen e saj në gjysmëfinale ndaj Argjentinës. Mesfushori Brozovic u tërhoq në minutën e 50, për shkak të shqetësimit muskulor dhe është në dyshim të fortë për finalen e vogël për medaljen e bronxtë. Qendërmbrojtësi 20-vjeçar Gvardiol kishte nevojë për injeksione për të përballuar dhimbjen e një dëmtimi në këmbë në mesjavë. Një panoramë në dritën e deklaratës së Dalic, që dikton ndryshime në formacion. Tekniku ka këmbëngulur se ai nuk do të rrezikojë asnjë lojtar që nuk është 100% në formë. Kështu që Lovro Majer dhe Kristijan Jakic duhet të jenë gati për të mbuluar Brozovic në mesfushë, nëse është e nevojshme.
Një tjetër qendërmbrojtës shumë i vlerësuar, Josip Sutalo, mund të zërë vendin e Gvardiol. Mbrojtësi i djathtë Josip Juranovic nuk ishte në gjendje të merrte pjesë në stërvitje të premten gjithashtu. Kështu që Josip Stanistic mund të thërritet të zëvendësojë bashkëlojtarin e tij të dëmtuar. Ndërsa Ivan Perisic duhet të mbajë vendin e tij në të majtë, pasi ai synon të bëhet golashënuesi më i mirë i të gjitha kohërave të Kroacisë në Kupën e Botës. Lojtari i Tottenham Hotspur ndan vendin me Davor Suker, në kuotën e gjashtë golave.
AGUERD, MAZRAOUI E SAISS “BRAKTISIN” MAROKUN
Regragui çuditërisht i rikuperoi të gjithë (Aguerd, Mazraoui dhe Saiss) për gjysmëfinalen e tyre. Por triumvirati i dëmtuar u largua një nga një – në rastin e Aguerd pak para se të binte bilbili i parë. Saiss u tërhoq gjithashtu pas 20 minutash, pasi e kishte të pamundur të ndiqte ritmin e Olivier Giroud. Ndërsa Mazraoui u largua gjatë intervalit të pjesës së parë, për të lënë Regraguin në vështirësi. Është e vështirë të parashikohet që Regragui të rrezikojë Mazraouin ose Aguerd që nga minuta e parë për ndeshjen me Kroacinë. Kështu që një rikthim në një 4-3-3 mund të jetë i duhuri, pasi Yahia Attiyat Allah dhe Selim Amallah synojnë të rikthehen në formacionin fillestar.