Episod i shëmtuar në ndeshjen mes Hyeres dhe Olympique Marseille, në 1/16 e Kupës së Francës. Në minutën e pesëmbëdhjetë, mbrojtësi i Marseille, Eric Bailly bëri një ndërhyrje shumë të rëndë ndaj një kundërshtari. Lojtari nga Bregu i Fildishtë ndërhyri me këmbën lart ndaj 26-vjeçarit Almike Moussa N’Diaye, duke e dëmtuar keq mesfushorin.
Ligue 1 është në pauzë dhe në Francë luhet Kupa Kombëtare. Një turne në të cilin në shumë raste ndodh të luhen sfida mes skuadrave të mëdha të elitës dhe klubeve të vogla provinciale. E në Hyeres, një qytet me rreth 50,000 banorë në rivierën franceze, kishte shumë pritshmëri për ndeshjen. Vendasit që luajnë në divizionin e katërt francez kanë sfiduar gjigantët e Olympique Marseille. Një ndeshje me një parashikim thuajse të qartë, që megjithatë u karakterizua nga një episod i keq. Ai ku mbrojtësi Eric Bailly ndërhyri në mënyrë të tmerrshme ndaj mesfushorit fatkeq të vendasve Moussa N’Diaye.
N’DIAYE NË SPITAL
Qendërmbrojtësi nga Bregu i Fildishtë, i huazuar te Marseille nga Manchester United, u parapri dukshëm nga kundërshtari. Kështu, ai ngriti në mënyrë të ekzagjeruar këmbën në një përpjekje për të kapur topin. Megjithatë, në vend të topit, Bailly goditi me forcë në gjoks N’Diaye, i cili u rrëzua në tokë. Arbitri ka nxjerrë menjëherë kartonin e kuq, me Marseille me 10 lojtarë. Mesfushori i Hyeres, pas 5 minutash ndërhyrje mjekësore, është larguar me barelë nga fusha. L’Equipe më pas shkroi se N’Diaye u dërgua menjëherë në spitalin më të afërt dhe u shtrua në njësinë e kujdesit intensiv si masë paraprake. Ndeshja gjithësesi përfundoi 2-0 në favor të skuadrës së Tudor.
VIDEO E NDËRHYRJES SË FRIKSHME
LE TACLE ASSASSIN DE BAILLY EN COUPE DE FRANCE ! 😱🟥pic.twitter.com/efeYjEN0Bg
— Midi/Minuit (@midiminuit__) January 7, 2023