Arne Slot dhe Feyenoord janë gati të sfidojnë Romën në çerekfinalet e Europa League. Një ndeshje që është praktikisht një ribërje e finales së Conference League të majit të kaluar. Në atë rast ishin verdhekuqtë e José Mourinho që buzëqeshën, të tërhequr nga goli i Zaniolo. Triumfi i tyre i parë historik në kompeticionin e tretë evropian, është një plagë e hapur për holandezët edhe sot. Kujtimi i Tiranës, në fakt i vlon gjakun trajnerit Slot: “Mund të kem ndjenja hakmarrjeje”.
Të parët në renditjen e +8 nga ndjekësit e tyre Ajax dhe Psv me gjashtë ndeshje të mbetura në Eredivisie, skuadra e Slot kërkon hakmarrjen për finalen e humbur në Tiranë. Në pas-ndeshjen e fitores së lehtë 5-1 kundër Ëaalëijk, trajneri nënvizoi synimet e skuadrës së tij në kuadër të dy ndeshjeve të Europa League: “Le të themi se e mbaj mend shumë mirë atë mbrëmje të pakëndshme në Tiranë. E njëjta gjë vlen edhe për djemtë që ishin atje vitin e kaluar. Por do të ishte e çuditshme nëse do të më duhej motivim shtesë, për një çerekfinale të Europa League”.
Një mesazh i qartë për Romën e Mourinhos, që pritet në Roterdam të enjten më 13 prill për të parën nga dy ndeshjet që do të vendosin se kush do të shkojë në gjysmëfinale: “Tani kemi një ekip pothuajse krejtësisht të ri dhe janë dy ndeshje. Kështu që situata është shumë e ndryshme në krahasim me disa muaj më parë”, tha Slot.