Kristjan Asllanit i është dashur të presë disa ditë, por në fund është bashkuar me Jasir Asanin në kënaqësinë e shënimit të golave më të bukur të raundit. Mbrëmjet europiane të qershorit kanë evidentuar mbi të gjithë dy shqiptarët, që magjepsën UEFA-n për nga mënyra e realizimit. Kështu, edhe Asllani ka marrë vlerësimin për golin më të bukur, duke mundur anglezin Bukayo Saka.
Përvec rëndësisë në kthimin e avantazhit për Shqipërinë në transfertën me Ishujt Faroe në një moment crucial të takimit, ai i 1-2 i realizuar nga mesfushori i Inter është i një bukurie absolute. E majta e kalibruar nën kryqëzimin e shtyllave, përfundoi në rrjetë pasi u përplas në pjesën e brendshme të traversës. Goli i Asllanit u evidentua mbi golin e Bukayo Saka në goleadën 7-0 të Anglisë ndaj Maqedonisë së Veriut. Nuk ishte mjaftueshëm për të kaluar mesfushorin e Inter edhe perla e Arda Guler, që mbylli 2-0 e Turqisë ndaj Uellsit. Në fund, doli ‘kokëulur’ edhe Roland Sallai, që shënoi finalin 2-0, me të cilën Hungaria likuidoi Lituaninë.
🇦🇱 Kristjan Asllani’s brilliant strike is your Goal of the Round ☄️#EQGOTT | @AlipayPlus pic.twitter.com/lyECJ2bp6B
— UEFA EURO 2024 (@EURO2024) June 23, 2023
MË I BUKURI, EDHE GOLI I ASANIT
Kristjan Asllani ndan fronin me një tjetër kuqezi, që me golin e shënuar ndaj Moldavisë mposhti edhe Elmas e Grant-Leon Ranos. Pas votimit, UEFA e shpalli fitues sulmuesin shqiptar që zhbllokoi ndeshjen kundër moldavëve. Goli fantastik i shënuar nga 27-vjeçari, i pari i sulmuesit me fanellën kuqezi, është përjetësuar kështu edhe nga UEFA për kënaqësinë e lojtarit.
Dy goditje me të majtën, që ekzaltojnë aftësitë individuale të organikës kuqezi, por edhe dëshmojnë lirinë më të madhe taktike që kanë me brazilianin Sylvinho në pankinë.