Policia franceze ka bastisur shtëpinë e presidentit të Paris Saint-Germain, Nasser Al Khelaifi. Numri 1 i klubit kryeqytetas po hetohet si pjesë e një hetimi mbi akuzat për pengmarrjen dhe torturimin e paligjshëm të një personi në Katar. Lajmin e ka konfirmuar një burim i afërt me rastin për AFP. Francezo-algjeriani Tayeb Benabderrahmane, 42 vjeçar, paraqiti një denoncim janarin e kaluar duke thënë se ishte arrestuar në janar 2020 në Katar. Aty ai ishte zhvendosur disa muaj më parë për të punuar si lobist. Benabderrahmane tha se ai u mbajt për gjashtë muaj dhe u mor në pyetje nga policia lokale, veçanërisht për dokumentet që ata besonin se ishin në posedim të tij. Ato dokumente mund të rezultojnë komprometuese për Al-Khelaifi, një shtetas i Katarit.
ÇFARË NDODHI…
Pasi u mbajt në arrest shtëpiak, ai thotë se më në fund u lejua të largohej nga Katari në nëntor 2020. Benabderrahmane u la i lirë vetëm pasi nënshkroi një marrëveshje moszbulimi mbi dokumentet. Një shënim nga shërbimi i brendshëm i inteligjencës franceze, DGSI, sugjeron se dokumentet mund të përfshijnë video intime të Al-Khelaifi me një grua. Bisedat midis Al-Khelaifi, ish-sekretarit të përgjithshëm të FIFA-s, dhe emirit të Katarit Tamim bin Hamad Al-Thani, të ruajtura në telefonin e tij të vjetër inteligjent, mund të kenë të bëjnë me historinë e Kupës së Botës 2022 dhe se si monarkia e Gjirit fitoi të drejtën për t’i pritur ato. Pastaj ka edhe disa gjëra për caktimin e të drejtave televizive për turneun, sërish sipas shënimit të DGSI-së.
E PËRFSHIRË EDHE ISH-MINISTRJA DATI
Vetë Benabderrahmane është subjekt i një hetimi i ndarë nga ai për akuzat kundër Al-Khelaifi. Ndërkohë, zëdhënësi i presidentit të PSG-së tha dje se “gjykatësi hetues kërkoi informacione dhe akses të mëtejshëm, të cilat iu dhanë plotësisht në transparencë të plotë dhe në bashkëpunim me autoritetet”. Avokati i Al-Khelaifi nuk pranoi të komentojë më tej. Hetuesit e krimit të organizuar javën e kaluar bastisën bashkinë e qarkut të shtatë të Parisit, të drejtuar nga ish-ministrja e kabinetit Rachida Dati, si dhe disa firma ligjore në lidhje me hetimin.
Benabderrahmane thotë se Dati bëri sikur do ta ndihmonte, për të siguruar lirimin e tij, ndërsa u përpoq të mbulonte ndalimin në favor të Katarit. Njerëz të afërt të Dati, ndërkohë, e cilësuan lobistin si një “mjeshtër shantazhues”. Avokatët e Al-Khelaifi thanë në prill se do të ngrenë një padi për shpifje kundër Benabderrahmane.