Kushtoi 135 milionë euro (përfshirë bonuset). Kur Reali i pagoi në arkën e Borussia Dortmund për të sjellë në Bernabeu Jude Bellingham, shumë menduan për maninë klasike për madhështi të Florentino Perez. Presidenti merengues, megjithatë, rrallëherë gabon një goditje (falë edhe arkave plot). Ancelotti kishte humbur Benzema dhe mendohej se do të ishte më e udhës të fokusohej te një sulmues finalizues, si Kane e Mbappé. Në vend të kësaj, erdhi mesfushori anglez i lindur në vitin 2003. E Madridi e nisi sezonin në një nivel të lartë.
STATISTIKAT
Gjashtë fitore nga gjashtë ndeshje mes La Liga dhe Champions League, gjashtë gola në gjashtë paraqitje për Bellingham. Anglezi shënoi edhe kundër Real Sociedad në kampionat. Shpesh realizon gola vendimtarë, si ai kundër Union Berlin, një hap larg fundit të takimit. Anglezi ka shumë ndikim në rezultatet dhe lojën e Madridit e përgjigja vjen nga cilësitë e tij të shkëlqyera të kombinuara me inteligjencën e trajnerit të tij. Ancelotti pa qendërsulmuesin e tij të nisej për në Arabinë Saudite. Italiani vendosi të fokusohet në një sistem tjetër loje, me një mesfushor sulmues pas dy sulmuesve. Sulmuesit, Vinicius dhe Rodrygo, janë ata që mbështetën Benzema sezonin e kaluar e që tani luajnë më të centralizuar. Gjithsesi ata janë të lirë për të kërkuar pozicionin në krah ose për t’u rikthyer për të liruar hapësirë për ata që vijnë nga pas.
DISPONIBILITETI TAKTIK
E nga pas vjen bateria e mesfushorëve më të fortë në botë. Modric, Valverde, Camavinga, Tchouameni, Kroos dhe Bellingham. Gjashtë kampionë për katër vende. Ancelotti i alternon ato në varësi të ndeshjeve dhe momenteve, por mbi të gjitha, të katër ata që luajnë ndryshojnë pozicionet e tyre pa role fikse. Kjo është më shumë për shkak të aftësisë lexuese të individëve sesa një lojë veçanërisht e sofistikuar dhe e organizuar. Bellingham, teorikisht një fantazist, e di se kur duhet të futet, kur është e nevojshme të mbështesë lojën në fazën e ndërtimit, kur të hapet dhe ku të drejtojë lojën e kundërshtarit. Pak futbollistë në botë kanë perceptimin e tij për hapësirën.
Kësaj inteligjence taktike duhet t’i shtohen edhe cilësitë personale që i lejojnë edhe një paraqitje të shkëlqyer para portës. Nuk mund të thuhet se ka lindur një yll, duke qenë se bota e futbollit e kishte vendosur tashmë në grupin e të rinjve më interesantë, por dyshimi është gjithnjë e më i fortë se për disa vite Jude Bellingham do të ketë një vend të përhershëm në formacionin më të mirë të botës së futbollit.