A u vodhën të dhënat e policisë?/ Balla: Balta u kthye në piedestal, s’ka asnjë provë!

Gjatë raportimit në Komisionin për Çështjet Europiane, Ministri i Brendshëm, Taulant Balla deklaroi se nuk ka pasur rrjedhje të dhënash nga sistemi TIMS, duke theksuar se “sistemi është i fortifikuar”. Nga ato që thotë Ministri i Brendshëm, e gjithë historia e denoncuar në media është një bllof i madh, sepse nuk ka pasur asnjë kopjim të të dhënave apo asnjë keqpërdorim të tyre.

“Rezulton se s’ka pasur asnjë rrezik, kopjim apo akoma më keq, kur balta kthehet në piedestal, që të ketë përdorim të këtyre të dhënave. Është e pamundur, do vij sa herë të më kërkoni”, tha ministri Balla.

Ministri i Brendshëm u shpreh se çështja po hetohet nga Prokuroria e Tiranës me këmbënguljen e tij, por ai është informuar nga personat përgjegjës dhe ka rezultuar se është e pamundur të ketë ndodhur ajo që flitet në media.

Lexo edhe: Akuzat për vjedhje në polici/ Muça: Skenare injorantësh, më sabotuan vartësit!

“Lidhur me pretendimet për rrjedhje të informacionit në sistemin TIMS, garantoj çdo shqiptar dhe të huaj se të dhënat e tyre janë 100% të mbrojtura. Nuk ka asnjë të dhënë që ka rrjedhur nga ky sistem i fortifikuar, falë asistencës së partnerëve tanë të huaj.

Sistemi është 100% funksional, pretendimet për një çështje të operimit të brendshëm, nuk ka shqetësim për rrjedhje të dhënash. Jam informuar në kohë reale nga vetë personat që pretendonin për këtë problematikë dhe i kam kërkuar Drejtorit të Përgjithshëm të Policisë dhe Drejtorit të Agjencisë së Mbikëqyrjes Policore, përfshirjen e menjëhershme të Prokurorisë AntiKorrupsion, por sugjeruan që të ndiqej nga Prokuroria e Tiranës. Kjo e fundit ka regjistruar një procedim, e mbështes dhe në çdo rast duhet të vendosim një standard që kur Prokuroria nis hetimin ne duhet të heshtim.

Garantoj qytetarët shqiptarë dhe të huaj që kanë hyrë dhe dalë në kufijtë e Republikës së Shqipërisë. Gjithë pretendimet të verifikohen nga Prokuroria, ta thotë ajo fjalën e fundit.

Nxis çdo rast të hetohet nga Prokuroria, por rezulton se s’ka pasur asnjë rrezik, kopjim apo akoma më keq, kur balta kthehet në piedestal, që të ketë përdorim të këtyre të dhënave. Është e pamundur, do vij sa herë të më kërkoni”, tha Balla.

Deri tani në media janë shpërndarë emaile anonime për një vjedhje të madhe të të dhënave në Ministrinë e Brendshme, por nuk ka asnjë dokument, asnjë filmim apo dëshmi bindëse se kjo ka ndodhur. Edhe zyrtarët e Ministrisë së Brendshme e kanë mohuar vjedhjen e të dhënave nga sistemet e policisë.