Gjykata e Lartë në Danimarkë ka dhënë një vendim në lidhje me trafikun në sasi të mëdha të kokainës. Gjykata e Lartë ka shpallur fajtorë 13 persona, përfshirë 10 shtetas shqiptarë, për pjesëmarrje në një rrjet të organizuar. Ky rrjet u mor me trafikimin, shpërndarjen dhe tregtinë e gjithsej 1122 kilogramë kokainë deri në arrestimin e tyre në 2019.
Personat e moshës 25 deri në 53 vjeç janë dënuar gjithsej me 183 vite burg, me 19 vite e katër muaj burgim për organizatorin. Pas një hetimi të plotë, policia ka zbuluar një rrjet shqiptar që ka qenë pas një pjese të madhe të tregtisë së kokainës në Kopenhagen. Kokaina trafikohej nga Holanda, Belgjika dhe Gjermania dhe telefonat e koduar përdoreshin për komunikim dhe koordinim të ndërsjellë.
Në Danimarkë, rrjeti kontrollohej nga një shqiptar i ardhur në Danimarkë në vitin 1998 me një identitet të rremë. Më pas, organizatori ka sjellë për disa vite anëtarë të familjes në Danimarkë dhe Suedi për ta ndihmuar atë në këtë sipërmarrje. Një kushëri i tij ishte, ndër të tjera, kreu i rrjetit në Suedi. Përveç kësaj, një kushëri tjetër ishte përgjegjës për përzierjen dhe rishitjen e kokainës si në Danimarkë ashtu edhe në Suedi.
Rasti, ku hetimi filloi nga Policia e Kopenhagenit në vjeshtën e vitit 2018, njihet si Operacioni “Goldfinger”. Pas themelimit të NSK dhe SSK në janar 2022, çështja u transferua këtu. Më 26 qershor 2019, policia bëri arrestime si në Danimarkë ashtu edhe jashtë saj. Hetimi u zhvillua në bashkëpunim me policinë në Suedi, Gjermani, Slloveni, Belgjikë, Holandë, Shqipëri dhe me EUROPOL dhe EUROJUST.