Edhe pak orë kanë mbetur deri në funeralin e Alexei Navalny, por ekipi i tij thotë se vazhdon të përballet me vështirësi në organizimin e ceremonisë së lamtumirës. Zëdhënësja e tij, Kira Yarmysh tha se ata nuk kishin mundur të gjenin një makinë funerali për ta çuar trupin në kishë.
“Njerëz të panjohur po telefonojnë agjencitë mortore dhe i kërcënojnë nëse pranojnë të marrin trupin e Alexeit” – tha Yarmysh. Varrimi është planifikuar të bëhet të premten në Maryino, në periferi të Moskës. Të mërkurën, ekipi njoftoi se shërbimi përkujtimor do të mbahej në orën 14:00 me orën e Moskës në Kishën e Ikonës së Zojës, “Shuaj dhimbjet e mia”. Varrimi do të bëhet më pas në varrezat e Borisovskoye aty pranë në orën 16:00. Shërbimi i varrimit do të transmetohet gjithashtu në internet në kanalin e Navalny në YouTube.
Navalny vdiq më 16 shkurt në një burg rus në Rrethin Arktik. Ai ishte në burg prej 3 vitesh me akuza të sajuara. Ekipi i tij, i cili ka inkurajuar njerëzit të marrin pjesë shpërndau një hartë të itinerarit midis dy vendeve. Ata shpërndanë gjithashtu edhe një listë të vendeve jashtë vendit, nga Seuli në Romë, Montreal dhe Stokholm ku njerëzit mund të bashkohen me shërbimet përkujtimore për Navalny. Është e paqartë se sa njerëz do të marrin pjesë në funeralin në Moskë të premten.
Në mars 2015, mijëra njerëz u rreshtuan në rrugë për të bërë homazhe ndaj politikanit të vrarë të opozitës Boris Nemtsov, por nuk ka gjasa që të ketë sërish ndonjë shpërthim të ngjashëm publik të pikëllimit për një kundërshtar të Presidentit Vladimir Putin. As nuk do të lejohet një gjë e tillë. Vitet e fundit, autoritetet ruse kanë goditur çdo veprim që mund të interpretohet si kritik ndaj qeverisë. Përpjekjet për të përkujtuar vdekjen e Navalny-t u pritën nga një përgjigje e ashpër, me monumente të improvizuara të pastruara dhe qindra të arrestuar.
Fotot që qarkulluan në mediat sociale pasditen e së enjtes treguan një prani të madhe policie dhe barriera që prisnin të vendoseshin si pranë kishës ku do të mbahet shërbimi përkujtimor, ashtu edhe në varrezat ku do të varroset Navalny. Kanali Telegram RusNews raportoi gjithashtu se kamera vëzhgimi ishin instaluar “në çdo rrugë” që rrethon varrezat. “Departamenti i Parë”, një grup avokatësh dhe mbrojtës të të drejtave të njeriut shpërndau këshilla në mediat sociale për ata që planifikojnë të shkojnë në funeralin e Navalny.
Ai paralajmëroi se mund të ketë “aktivistët pro-qeveritarë” që veprojnë si provokatorë dhe u bëri thirrje njerëzve të qëndrojnë vigjilentë. “Arrestimet nuk përjashtohen pas ceremonisë… Qëndroni nën radarin e forcave të sigurisë. Mos përdorni transportin publik dhe mos aplikoni për dokumente në ditët pas funeralit”.
Këshillat përfshin gjithashtu mos mbajtjen e objekteve me fotografinë e Navalny ose simbolin e Fondacionit të tij Kundër Korrupsionit, i cili u shpall një organizatë ekstremiste nga autoritetet ruse. Nuk dihet se cilët anëtarë të familjes së Navalny do të jenë në gjendje të marrin pjesë në funeral, përveç nënës së tij, Lyudmila, e cila kohët e fundit akuzoi publikisht autoritetet për mbajtjen e trupit të djalit të saj.
Fëmijët e Navalny, Daria, 23 vjeç dhe Zakhar, 15 vjeç, jetojnë jashtë vendit. E veja e tij, Yulia, nuk mendohet se aktualisht jeton në Rusi, por mund të rrezikohet të arrestohet nëse kthehet për shkak të punës së saj me ekipin e Navalny dhe deklaratave të saj të fundit publike në të cilat ajo fajësonte presidentin rus Vladimir Putin për vdekjen e burrit të saj.
Autoritetet thuhet se janë përpjekur të pengojnë përpjekjet e ekipit të Navalny për të organizuar një ceremoni publike lamtumire për kreun e opozitës për ditë të tëra. Të martën, zonja Yarmysh tha se ekipi i Navalny po përpiqej të gjente diku për të mbajtur ceremoninë. Disa shtëpi funerale kishin pretenduar se ishin rezervuar plotësisht, tha ajo, ndërsa të tjera u thanë atyre se ishin “të ndaluar” të punonin me ta. E veja e Navalny, Yulia tha në një fjalim të mërkurën se nuk e dinte nëse funerali do të ishte paqësor apo nëse policia do të arrestonte ata që erdhën për të thënë lamtumirë. ©LAPSI.al