“Nuk gabojmë më” kishte premtuar Orges Shehi para ndeshjes, por Partizani bën një tjetër hap fals në Laç, duke rrezikuar madje edhe të dilte i mundur. Mbyllet 1-1 mes kurbinasve e të kuqve për javën e 29 të Superiores, pas kthimit nga pauza e kombëtares, me kryeqytetasit që luajtën gjatë me 10 lojtarë. Kartoni i kuq i Carës pas 18′ i komplikoi gjërat, edhe pse Partizani kaloi i pari në avantazh me golin e mbrojtësit Sota. Në pjesën e dytë, Sobowale barazoi rezultatin para se Qirko të ishte vendimtar me penalltinë e pritur.
Laçi, në fakt, ishte më ngulmues gjatë gjithë ndeshjes. Intensiteti i kurbinasve u shtua edhe më shumë pas kartonit të kuq të Carës. Ndërhyrja e sulmuesit të kuq ndaj Kurtit fillimisht u ndëshkua me të verdhë nga Xhaja, që u thirr te VAR dhe pas rishikimit përjashtoi lojtarin e Partizanit. Me 10 lojtarë ishte Partizani që gjeti avantazhin. Sota shënoi pas zhvillimeve kaotike të një goditje këndi dhe Shehi mendoi se ishte më e udhës të mbrohej.
Lexo më tej: Video/ Balaj nuk mjafton, Blazevic i jep asist Partizanit: Erzeni ndal Vllazninë në Loro Boriçi
QIRKO HERO, POR MBROJTJA PROBLEMATIKE
Gjërat ndryshuan në pjesën e dytë, kur Cungut aktivizoi Myrtën dhe Sobowale, në vend të Bajramajt dhe Kryeziut. Kombinimi i dy të sapofuturve sollën golin e barazimit. Sobowale finalizoi një aksion të gjithin në shtëpi, por Laçi kishte një marsh më shumë dhe kërkoi të dytin. Shehi u mbrojt me zëvendësimet e tij, por në minutën e 61′ Mikulic shkaktoi një penallti që mund të ishte fatale. Për fatin e të kuqve, Ujka u hipnotizua nga Qirko që shpëtoi rezultatin.
Cungu nxiti të tijtë të shtyjnë përpara, por nujk pati më gol dhe Partizani mbetet në vendin e tretë, me 47 pikë, tre pikë pas Vllaznisë, në renditjen e kampionatit. Laçi mbetet në zonën playout +4 nga zona e rënies.