Vizat që ndajnë Ramën, Metën dhe Bashën për kokainën kolumbiane

Sapo doli lajmi për kapjen e 613 kilogramëve kokainë në Maminas, menjëherë në Tiranë nisën përplasjet politike. Në njërën anë është Edi Rama që thotë se nuk ka pasur sinjalizime nga jashtë për aksionin e policisë. Në anën tjetër është Ilir Meta dhe Lulzim Basha që falenderojnë shërbimet partnere.

“Kjo ngarkesë rekord e kokainës nuk mund të kalonte nga Shqipëria pa garanci politike. Këtë paralajmëroi edhe Kryeprokurori i Antimafias de Raho të hënën në Tiranë, kur deklaroi se mafia ka lidhje me politikën shqiptare dhe ka pushtuar policinë. Me këtë rast dua ti shpreh mirënjohjen partnerëve të huaj që drejtuan operacionin me sukses dhe e vunë para faktit të kryer narkoshtetin dhe levat e tij në Shqipëri.” ishte komenti i Lulzim Bashës, që u përforcua edhe nga Ilir Meta.

Presidenti përshëndeti direkt antimafian italiane për operacionin, duke lënë të kuptohet se sinjalizimi për operacionin erdhi nga Italia.

“Presidenti Meta përshëndet rolin e Anti-Mafias italiane dhe paralajmërimet e saj konsistente për rrezikun që i vjen, jo vetëm Shqipërisë dhe Italisë, por edhe rajonit, nga fuqizimi i krimit të organizuar” thuhet në njoftimin për shtyp të presidencës.

Edi Rama kundërshtoi deklaratat e mësipërme kur tha se nuk ka pasur asnjë sinjalizim nga shërbimet partnere për kapjen e kokainës në Maminas.

“Edhe fakti që ky operacion është zhvilluar i gjithi në territorin e vendit, pa asnjë sinjalizim nga vendet europiane ku ngarkesa ka udhëtuar përpara se sa të hynte në portin e Durrësit, ka domethënien e rëndësishme të forcës ligjzbatuese që disponojmë sot, duke nisur nga pikat doganore” u shpreh Rama.

Debati politik përreth malit me kokainë, bëhet ndërkohë që bosët e vërtetë të drogës janë ende të lirë. Policia ka mundur të vërë në pranga vetëm dy djem 25 vjeçarë, njëri prej të cilëve ishte shoferi i kamionit. Administratori i kompanisë Arbër Çekaj është ende i lirë.

Ende nuk dihet kush e drejtonte supertrafikun e kokainës, kush doli garant për kalimin në portin e Durrësit, magazinimin në Maminas dhe nxjerrjen jashtë të kësaj sasie gjigande kokaine të kapur në vendin tonë. Prokurori i Krimeve të Rënda Besim Hajdarmataj tha se hetimet janë në vazhdim, por eksperienca ka treguar se sa më shumë kalojnë orët aq më të pakta janë shanset që të goditen organizatorët e trafikut të drogës©Lapsi.al