Dalin detaje të reja për ngjarjen e mëngjesit të sotëm pranë liqenit të Sharrës, ku 49-vjeçarja Lirie Xhepa u gjet e dhunuar dhe me 3 plumba në trup.
I dyshuar për vrasjen është kunati i 49-vjeçares, Dashamir Xhepa, i cili është shpallur në kërkim policor.
Gjatë kontrollit në banesë, policia nuk e ka gjetur aty kunatin e viktimës. Policia po heton në disa pista, ku nuk përjashtohet edhe një lidhje intime mes viktimës dhe kunatit të saj që dyshohet se ka kryer vrasjen.
49-vjeçarja ishte larguar nga banesa që në mbrëmje pa lenë adresë. Pasi nuk ishte kthyer deri në mëngjes, djemtë e saj shkuan në komisariatin nr.6 për të denoncuar zhdukjen dhe aty morën edhe lajmin se nëna e tyre ishte ekzekutuar.
Duhen analiza të posaçme për të përcaktuar orën e vdekjes, por sipas informacioneve të grupit hetimor, gruaja është vrarë brenda 24 orëve të fundit.