Ranitidina, medikamenti që përdoret për shqetësimet e stomakut, hiqet nga përdorimi edhe nga tregu farmaceutik në Shqipëri. Pas njoftimit të Agjencisë Europiane të Barnave se disa ilaçe që kanë në përbërje ranitidinë kanë elemente kancerogjene.
Agjencia Kombëtare e Barnave njoftoi tërheqjen e disa medikamenteve. Drejtues të saj u bëjnë thirrje mjekëve në spitale publike, private dhe në qendra shëndetësore të mos i japin me recetë Ranitidinën dhe barnat që përmbajnë këtë element.
Agjencia ka nisur kontrolle në farmaci dhe depo për zbatimin e këtij urdhri. Në rast se konstatohet tregtim i këtij medikamenti dhe barnave me përmbajtje Ranitidinë do të ketë masa ndaj farmacive.
Administrata Amerikane e Barnave dhe Agjencia Europiane e Barnave njoftuan se në barnat Ranitidinë apo me përmbajtje të këtij elementi, pas testeve laboratorike është gjetur lëndë kancerogjene.
Çfarë është Ranitidina?
Ranitidina frenon veprimin e histaminës duke ndalur sekretimin e acidit gastrik gjatë ditës si edhe gjatë natës në stomak. Ranitidina ul aciditetin dhe vëllimin e lëngut gastrik. Një dozë e vetme është e efektshme për më shumë se 12 orë. Pirja e duhanit ndikon në uljen e efektit të terapisë me ranitidinë. ©LAPSI.al