Ka nisur tashmë numërimi mbrapsht për finalen e madhe të UEFA Europa Conference League, që do të zhvillohet në Tiranë në stadiumin Air Albania. Kjo sepse, nesër në ambientet e selisë së UEFA-s në Zvicër do të hidhet shorti i fazës së 1/8 i së këtij kompeticioni, pasi të jenë mësuar tetë skuadrat që do të kualifikohen nga ndeshjet e playoff (ndeshjet do të zhvillohen mbrëmjen e sotme).
Si vendi organizator, Shqipëria do të ketë të pranishëm një përfaqësues në shortin e ditës së nesërme. Bëhet fjalë për ish-kapitenin e Kombëtares shqiptare, Altin Lala, i cili do të ndjekë nga afër këtë ceremoni dhe së bashku me përfaqësues të UEFA-s do të tërheqë goglat për të përcaktuar çiftet e fazës së 1/8: “Për faktin që është finalja e parë e një aktiviteti kaq madhor për Shqipërinë, natyrisht që ndihem edhe unë krenar që marr pjesë në këtë short dhe të jem i ftuar nga UEFA – tha Lala në një prononcim për fshf.org -. Është e jashtëzakonshme për mua dhe shpresoj që edhe ne si Federatë, si shtet, si komb, ta justifikojmë këtë finale duke i bërë organizimin e mirë dhe mikëpritjen, që në fakt është virtyti ynë. Besoj se do jetë një festë shumë e bukur”!
Ish-mesfushori kuqezi ka vazhduar më tek: “Nuk do e kishim menduar më parë që do kishim fatin që në Shqipëri të zhvillohej një ndeshje e këtyre përmasave. Kjo tregon edhe punën që Federata ka bërë ndër vite dhe vlerësimin që UEFA i ka bërë FSHF-së, duke i besuar zhvillimin e kësaj finaleje. Gjithashtu edhe stadiumi, që është shumë i bukur. Unë kam luajtur në shumë vende, por stadiumi në Tiranë është me të vërtetë i jashtëzakonshëm”, përfundoi Lala.
