Mbrëmje spektakolare në Champions me rezultate në kufijtë e ta pabesueshmes. Real Madrid e Ancelotti kthehen nga Napoli me fitoren e vuajtur 2-3, falë autogolit të Meret. Manchester United rrezikon eliminimin i mundur në shtëpi nga Galatasaray. Nuk shkoi mirë edhe për Arsenal në transfertën me Lens, fitimtar 2-1. Bayern Munich ia doli në Copenhagen me adoleshentët Musiala e Tel, ndërsa Inter i falet Thuram për fitoren e parë në Champions.
GRUPI A
Përmbysje e suksesshme për Bayern Munich, që me vështirësi mposhti 2-1 Copenhagen në Danimarkë. Pas një pjese të parë pa emocione, vendasit kaluan në epërsi në mënyrë të bujshme në pjesën e dytë. Lerager shënoi në minutën e 55′, por bavarezët barazuan në minutën e 67′ me Musiala. Në fund, djemtë e Tuchel arritën të fitojë falë golit të Tel në minutën e 83′.
Në ndeshjen tjetër të grupit është krizë e thellë për Manchester United, i mposhtur në Old Trafford 3-2 nga Galatasaray. Djajtë e Kuq zhbllokuan ndeshjen në minutën e 17′ me Hojlund, por turqit barazuan menjëherë (23′) falë Zaha. Sulmuesi danez u përsërit në minutën e 67′, por edhe një herë miqtë barazuan rezultatin, në minutën e 71′ me Akturkoglu. Në minutën e 77′, skuadra e ten Hag mbeti me 10 lojtarë për shkak të përjashtimit të Casemiro, por Icardi humbi penalltinë e avantazhit të mundshëm. Argjentinasi u korigjua pak minuta më vonë, duke shënuar golin e 3-2 në minutën e 81′. Pas këtyre rezultateve, Bayern kryeson me 6 pikë, i ndjekur nga Galatasaray me 4. Vetëm 1 pikë për Copenhagen, ndërsa United mbetet ende në mënyrë sensacionale me 0.
GRUPI B
Goditje e madhe e Lens, 2-1 në shtëpi me përmbysje kundër Arsenal. Gunners e nisën mjaft mirë dhe në minutën e 14′ e thyen ngërçin. Topi i rikuperuar nga Saka u shërbye për Gabriel Jesus që shënoi 1-0 me një diagonale të përsosur në hyrje të zonës. Pas avantazhit, londinezët u zbehën dhe në minutën e 25′ pësuan golin e barazimit. Machado ndërpreu rivënien e portierit, shërbeu për Wahi, që pothuajse në akrobaci pasoi për Thomasson që bëri 1-1. Në pjesën e dytë, skuadra e Arteta insistoi për golin e fitores, por në momentin më të mirë të skuadrës angleze Lens i ndëshkoi. Në minutën e 69′ Frankowski asistoi për Wahi që bëri 2-1.
Barazim i çmendur 2-2 mes PSV-së dhe Sevilla, mes golave të anuluar dhe ndërhyrjeve të VAR. Fillimisht dyzet e pesë minuta pa shumë emocione, pastaj në pjesën e dytë ndodhi gjithçka. Në minutën e 53′ avantazhi i andaluzianëve me Pedrosa u anulua. Sevilla megjithatë shënoi golin e parë në minutën e 68′ me Gudelj. Luuk de Jong barazoi 1-1 me penallti në minutën e 86′, por më pak se një minutë më vonë spanjollët kaluan sërish në avantazh me anë të En-Nesyri. Në kohën shtesë, holandezët arritën të barazojnë 2-2 me Teze në minutën e 96′. Lens fluturon në krye të grupit me 4 pikë, i ndjekur nga Arsenal (3), pastaj Sevilla (2) dhe PSV (1).
GRUPI C
Një Napoli i madh nuk mjaftoi për të shmangur humbjen ndaj Real Madrid në raundin e dytë të grupit C të Champions League. Në Maradona përfundoi 3-2 për Los Blancos. Ostigard zhbllokoi ndeshjen në minutën e 19′, por spanjollët përmbysën gjithcka me Vinicius (27′) dhe Bellingham (34′). Një ndeshje me ritëm dhe raste, të cilën penalltia e Zielinski e ktheu në ekuilibër në minutën e 54′. Për fatin e keq të Napolit, në minutën e 78′ ndeshja u vendos nga autogoli i pafat i Meret, që devijoi në rrjetë pas goditjes së Valverde. Merengues me 6 pikë udhëheqin grupin, të ndjekur nga Napoli e Braga me 3. Portugezët mundën në ndeshjen tjetër Union Berlin, që është i fundit me 0 pikë.
Lexo më tej: Champions/ Braga, përmbysje spektakolare në Berlin nga 2-0 në 2-3: Real Sociedad thyen Salzburg
GRUPI D
Në raundin e dytë të fazës së grupeve të Champions League, Inter mposhti 1-0 Benfica 1-0 dhe kaloi në krye të grupit D së bashku me Real Sociedad. Pas një pjese të parë të ekuilibruar, zikaltrit u rritën në pjesën e dytë dhe dominuan mbi portugezët. Lautaro Martinez goditi fillimisht traversën (55′) dhe më pas shtyllën (61′). Për të shpërthyer entuziazmin e fitores së parë në Champions në San Siro mendoi një minutë më vonë Thuram, që mposhti Trubin. Më pas nisi një duel personal mes Toros dhe portierit ukrainas, i cili i tha jo 4 herë sulmuesit të Inter. 4 pikë për skuadrën e teknikut Inzaghi, në shoqërinë e baskëve të Sociedad. Spanjollët mundën në ndeshjen tjetër Salzburg, që mbetet me 3 pikë, ndërsa e mbyll Benfica me 0.
REZULTATET E MBRËMJES
Champions League Group A
FC Copenhagen 1-2 Bayern Munich
Manchester United 2-3 Galatasaray
Champions League Group B
Lens 2-1 Arsenal
PSV Eindhoven 2-2 Sevilla
Champions League Group C
Union Berlin 2-3 SC Braga
Napoli 2-3 Real Madrid
Champions League Group D
FC Salzburg 0-2 Real Sociedad
Inter 1-0 Benfica