Nën hetim për korrupsion, jep dorëheqjen kryeministri i Portugalisë

Kryeministri portugez Antonio Costa jep dorëheqjen, vetëm disa orë pasi prokurorët arrestuan shefin e tij të shtabit në një hetim për korrupsion të dyshuar në trajtimin e projekteve të minierave të litiumit dhe hidrogjenit në vend nga administrata e tij.

Costa, për të cilin prokurorët thanë se ishte objektivi i një hetimi të veçantë, njoftoi vendimin në një deklaratë televizive pas takimit me Presidentin Marcelo Rebelo de Sousa të martën.

62-vjeçari Costa, lideri socialist i Portugalisë që nga viti 2015, mbrojti pafajësinë e tij.

“Unë besoj plotësisht në sistemin e drejtësisë,” tha ai. “Nëse ka dyshime, atëherë autoritetet gjyqësore janë të lira t’i shqyrtojnë ato … Unë nuk jam mbi ligjin.”

Presidenti de Sousa pritet të pranojë dorëheqjen e tij.

Opozita ka kërkuar që qeveria të largohet me efekt të menjëhershëm.

Disa orë përpara njoftimit, policia portugeze arrestoi Vitor Escaria, shefin e shtabit të Costa, gjatë bastisjeve në disa ndërtesa publike dhe prona shtesë si pjesë e hetimit për korrupsion.

Prokurorët emëruan Ministrin e Infrastrukturës Joao Galamba si të dyshuar zyrtar dhe arrestuan shefin e shtabit të Kostës. Si i dyshuar u emërua edhe kreu i agjencisë mjedisore të vendit.

Zyra e prokurorit të shtetit ka thënë se Gjykata e Lartë e vendit po shikon “përdorimin e emrit të kryeministrit dhe përfshirjen e tij për të zhbllokuar” aktivitetet që po hetohen.

Aktivitetet që po hulumtohen nga gjyqtari hetues përfshijnë akuza për keqbërje, korrupsion të zyrtarëve të zgjedhur dhe shitje të ndikimit në lidhje me koncesionet e minierave të litiumit pranë kufirit verior të Portugalisë me Spanjën, si dhe planet për një fabrikë të gjelbër hidrogjeni dhe qendër të dhënash në qytetin Sines. rreth 100 km (62 milje) në jug të Lisbonës.

Fabrika e hidrogjenit dhe minierat e litiumit janë pjesë e një nisme të gjelbër të mbështetur nga Bashkimi Evropian. Përveç shefit të shtabit të Kostës, urdhër-arrestet u lëshuan edhe për kryetarin e qytetit të Sines dhe dy drejtuesit e kompanisë Start Campus, të ngarkuar me ndërtimin e projektit të prodhimit të hidrogjenit dhe qendrës së të dhënave.