Dy rikthime e fare pak ndryshime në listën e të besuarve të teknikut të kombëtares Sylvinho, për dy ndeshjet e fundit kualifikuese për Euro 2024 kundër Moldavisë dhe Ishujve Faroe. Tekniku brazilian është pothuaj me një këmbë në Gjermani, por kërkon të shkojë si vendi i parë në Grupin E. Për llogaritë një pikë është e mjaftueshme për të shkuar në Europian dhe Sylvinho kërkon të shkojë me njerëzit e tij të besuar. Kthehet Ismajli pas dëmtimit e mbetet në shtëpi Mihaj, shpluhëroset Muçolli, që merr vendin e lënë bosh nga Broja.
Asnjë ndryshim në portë, mbrojtje e mesfushë, duke i besuar të njëjtëve futbollistë të thirrur në fitoret me Çekinë dhe Bullgarinë. Përjashtim bën vetëm rikthimi i Ardian Ismajlit, që mungoi i dëmtuar. Jashtë mbetet Mihaj, me lojtarin që ka shpejtuar të “justifikojë” mos grumbullimin me një dëmtim.
Arbnor Muçolli është risia e vetme e brazilianit që rikthen në radhët e kuqezinjve sulmuesn e Göteborg. Lojtari po kalon një formë mjaft të mirë në Suedi dhe fakti që ai i shtohet gjashtë sulmuesve të tjerë, tashmë të përhershëm, tregon dëshirën e kuqezinjve për të fituar vendin e parë. Muçolli do të marrë në organikë vendin e Armando Brojës, që vazhdon të jetë i dëmtuar.
Kuqezinjtë nisin grumbullimin zyrtarisht të hënën e 13 tetorit dhe futbollistët që do të përfundojnë më herët impenjimet me skuadrat e tyre do të mbërrijnë në Tiranë nga e diela. Shqipëria do të zhvillojë ndeshjen e parë të këtij muaji në transfertën e Moldavisë më datë 17 nëntor, me sfidën që nis në ora 18:00, ndërsa më datë 20 nëntor Kombëtarja do të presë në stadiumin ‘Air Albania’ përfaqësuesen e Ishujve Faroe, për të përmbyllur kështu këtë edicion të kualifikueseve të Kampionatit Europian “Gjermani 2024”.
