Rrëfimi i gazetarit të BBC/ Përballë Putin në konferencën e fundvitit

Për herë të parë që nga pushtimi i Ukrainës nga Rusia, jam ftuar në një aktivitet të Kremlinit. Unë jam në një dhomë me Vladimir Putin.

Bashkë me 600 persona të tjerë.

Në një sallë ekspozite përballë Kremlinit, në një studio televizive të ndërtuar posaçërisht, e mbushur me ekrane video dhe shënues elektronikë, gazetarët rusë dhe disa korrespondentë të huaj po shohin udhëheqësin e Kremlinit të mbajë një konferencë shtypi të fundvitit të kombinuar me një telefon televiziv. Ai merr pyetje edhe nga anëtarët e publikut dhe mediat e përzgjedhura.

Nuk mund të humbasësh spektaklin. Domethënë, nëse jeni në Rusi dhe keni televizorin të ndezur. Programi transmetohet drejtpërdrejt nga të gjitha kanalet kryesore televizive ruse.

Quhet “Rezultatet e Vitit me Vladimir Putin”. Në fakt, kjo është bota sipas Vladimir Putin.

Një botë në të cilën lideri i Kremlinit ka absolutisht të drejtë për gjithçka.

“Kam mësuar të identifikoj atë që është më e rëndësishmja” – thotë Presidenti Putin “dhe më pas të bëj gjithçka për të arritur ato synime, pa i kushtuar vëmendje të parëndësishmes”.

Synimet e tij për luftën nuk kanë ndryshuar. Spikerja i bën një pyetje Putinit, e cila është dërguar nga një shikues. Bëhet fjalë për “operacionin ushtarak special” të Rusisë në Ukrainë: “Kur do të ketë paqe?”

“Kur të arrijmë qëllimet tona” – përgjigjet presidenti.

Vitin e kaluar, Vladimir Putin ishte nën presion të madh. “Operacioni i tij special” kishte shkuar keq.

Me pranimin e vetë Kremlinit, ushtria ruse kishte pësuar humbje “të rëndësishme”. Ukraina po tërhiqte me kthetra territorin e pushtuar nga Rusia: situata e kishte detyruar presidentin rus për një “mobilizim të pjesshëm”, duke tërhequr qindra mijëra burra rusë për të luftuar në Ukrainë.

Nuk është për t’u habitur, pra, që Kremlini anuloi vitin e kaluar telefonimin e Putinit dhe konferencën për shtyp në fund të vitit, të cilat zakonisht janë dy ngjarje të veçanta.

Shpejt kaloi një vit. Autoritetet ruse ndjejnë një lodhje në rritje nga lufta në të gjithë Evropën dhe në Shtetet e Bashkuara. Dhe kundërofensiva e Ukrainës ka dështuar të bëjë ndikimin që Kievi kishte pritur.

Vladimir Putin po duket gjithnjë e më i sigurt për situatën në fushën e betejës.

“Praktikisht përgjatë gjithë linjës së kontaktit forcat tona të armatosura, për ta thënë butë, po përmirësojnë situatën e tyre” – thotë presidenti.

Pjesa telefonike e shfaqjes është projektuar për të portretizuar presidentin Putin si “njeriu që ndreq” Rusinë dhe për të rritur popullaritetin e tij përpara zgjedhjeve presidenciale të marsit të ardhshëm.

Në një video-mesazh, një pensionist rus ankohet për rritjen e çmimit të vezëve.

“Presidenti im i preferuar”, deklaron ai, “ju lutem ndiko për këtë situatë”.

Shikoj drejt presidentit dhe lart në një ekran gjigant që tregon mesazhet me tekst të dërguara nga shikuesit.

Ka shumë lëvdata për Putinin.

“Si të sigurohemi që Putini të jetojë përgjithmonë?” – lexohet në një mesazh. “Një Putin i fortë është një Rusi e fortë.”

Por ka edhe tekste kritike: “A dëshiron Putini t’i japë fund luftës?”

“Vladimir Vladimirovich, ju keni qenë në këtë detyrë shumë gjatë.”

“Kur do të ndryshojë pushteti në Rusi?”

“A mund të më thoni se si të shkoj në Rusinë që shohim këtu në TV?”

Asnjë nga këto kritika nuk i bëhet presidentit gjatë transmetimit apo nuk lexohet në transmetim. Vështirë për t’u habitur. Kjo ekstravagancë televizive është krijuar për të promovuar Putinin, jo për të hedhur dyshime mbi punën e tij.

Por fakti që ato mesazhe kanë arritur në ekranin e videos sugjeron që Kremlini, të paktën, ndjen nevojën për të lënë të kuptohet për ekzistencën e pikëpamjeve të ndryshme – pa u dhënë atyre shumë rëndësi.

Maratona 4-orëshe është koreografi e kujdesshme. Mund të isha i ftuar, por presidenti nuk pranoi asnjë nga pyetjet e mia.

Gjynah. Gati dy vjet pas pushtimit që ai urdhëroi, kishte kaq shumë për të kërkuar. ©Nga Steve Rosenberg – BBC, LAPSI.al