“Mendoj se në pjesën e dytë bëmë diçka më shumë. Por ashtu siç shkoi loja mendoj se rezultati më i drejtë ishte barazimi”. Edlir Tetova pranon verdiktin e fushës, që pa Egnatian e tij të ndalonte për të dytën ndeshje radhazi në një barazim, këtë herë pa gola. Tekniku i rrogozhinasve sidoqoftë nuk pranon nënvleftësimin e kundërshtarit, por komplimenton sjelljen e tyre difensive: “Nuk mendoj se ishte relaks. Të gjithë çunat donin ta fitonin ndeshjen. Laçi sot ishte për t’u përgëzuar, sepse po thuajse nuk kishte fare hapësira”.
Tetova pastaj shpjegoi zhgënjimin e tij, për mënyrën e lojës së të tijve: “Sot doja të provoja Ibrahimoglunë që të shkonte në thellësi si Zejnullai, gjë që nuk e arritëm fare. Unë do mundohem që t’i përshtat lojtarët që t’i gjej aty ku bëjnë më mirë”. Pastaj në lidhje me “Final 4” që duket i blinduar për Egnatian, tekniku tha: “Nuk kam ndonjë preferencë të them të drejtën. Duhet të karikojmë lojtarët, t’i kemi të gjithë të gatshëm. Me kë do e kesh nuk është shumë e rëndësishme”.
JOSA: “PERSONALISHT NUK FUTEM PËR 1 PIKË”
“Ndeshja mund të kishte marrë rrjedhë tjetër, ishte rasti i penalltisë që mund të shënonte Egnatia. Në përgjithësi jam i kënaqur me mënyrën se si lojtarët u vendosën në fushë, se si luftuan për të mbyllur hapësirat. Por nga ana ime nuk jam i kënaqur. Nëse ishim 3-4 herë te porta e kishim raste për të shënuar, duhej të kishim përpjekje shumë më të mëdha për të qetësuar topin në mesfushë e për të dalë më pastër në zonën kundërshtare. Nuk ishim futur për barazimin, por kur e merr me skuadrën që kryeson, lojtarëve nuk mund t’u thuash asgjë”.
Lexo më tej: Egnatia ndalet nga Laçi, e tradhëtuar nga Spahiu: mesfushori humbet penalltinë kundër ish-skuadrës së tij
Josa në fund tregoi edhe përse nuk është entuziast për barazimin në shtëpinë e Egnatias: “Unë personalisht nuk futem për 1 pikë”. Tekniku e ka të qartë se Laçi kërkon një vend në katër të parët, por nuk është se e ka me nxitim: “Nuk është problemi ku duhet të kapim në “Final Four”. Laçi duhet të sigurojë tre pikët, në ndeshjen e ardhshme duhet të sigurojmë tre pikët që të jemi në rrugë të drejtë për t’i shkuar deri në fund objektivit që kemi. Në 10 minutat e fundit të themi të drejtën, kur vjen deri aty, çdo trajner edhe mundohet që fundja e fundit, të kapi çfarë të kapi”.