“Janë momente, situata loje, goli erdhi jo nga pasimi e meritë të Dinamos, fitohet topi e ndodhi. Ekipi ishte në ekuilibër, në pjesën e parë nuk kishte shumë rrezik, por e thashë që ne ishim më afër golit”. Edlir Tetova vazhdon të justifikohet me faktin se gabon skuadra e tij, duke harruar se kjo nuk ka rëndësi, kur nuk fiton prej 5 ndeshjesh. Tekniku i Egnatias, pas 1-1 me Dinamon, nuk e fsheh shqetësimin: “Mungesa e fitoreve? Patjetër që shqetëson, por këtë e kemi marrë përsipër me rotacionin që të sjellim lojtarët në formë. Kishim 3 mungesa e Fernando rrezikoi që hyri i dëmtuar. Aleksi e Ndreca ishin mungesa të rëndësishme sot. Por edhe ata që modifikuam siç ishte rasti i Xhemajlit që e kaluam majtas, deri diku bëri mirë. Me kthimin e skemës, gjithçka ishte në ekuilibër”.
Tetova pastaj u ndal te ndeshja e kthimit çerekfinale e Kupës së Shqipërisë, duke e vënë në prioritet përpara përplasjes me Tiranën në kampionat: “Mendojmë që kemi ndeshjen e Kupës një herë përpara, pastaj të mendojmë për Tiranën. Tani fillohen e ngushtohen diferencat e do të mundohemi që të bëjmë më mire”.
MEHMETI: “DUHET TË KISHIM FITUAR NE”
“Mendoj se sot, pavarësisht se Egnatia është në krye me meritë, Dinamo meritonte shumë më tepër, pra fitoren. Se në 2-3 momente si ishte një aksioni i joni që dilnim 2 kundër 1, gjyqtarja mund të ishte e kujdesshme e të lejonte avantazhin”. Dritan Mehmeti është i kënqur me pikën e marrë në shtëpinë e kryesuesve, pavarësisht se kjo e mban për momentin jashtë katërshes finale. “Duhet patjetër që të harrojmë këtë sot, por të mendojmë për javën e ardhshme se sa vjen e vështirësohet kampionati”.
Lexo më tej: Video/ Zejnullai spektakolar, por Egnatia ngec: Dinamo i rrëmben barazimin në Rrogozhinë me Kaçorrin
Objektivi është aty dhe 6 rezultate pozitive në 7 të fundit është një kuotë optimiste: “Nuk e mendoj se e shohim sa i vështirë është kampionati, janë në lojë shumë skuadra. Ne duhet të shohim ndeshjet një nga një, duhet të kemi këtë mentalitet e grintë në fushë. Nëse sheh afatgjatë e humb objektivat afatshkurtër, çekuilibrohesh. Ne duhet të rrimë me këmbë në tokë dhe shohim ndeshjen e radhës me Teutën”, tha Mehmeti.