Administratori i deleguar i Milan Giorgio Furlani shfaqet i qetë, mes ndeshjes së kthimit të Europa League dhe momentit më delikat të shoqërisë. Pasi mbërriti në Çeki për drekën tradicionale të UEFA-s para ndeshjes, drejtori ekzekutiv bëri shaka me gazetarët që i kërkuan lajme në lidhje me hetimet nga Prokuroria e Milanos që nisën disa ditë më parë: “Përshëndetje të gjithëve, jam ende këtu, siç mund ta shihni”. Më pas ai nënvizoi për Sky: “Faktet janë të thjeshta, Milan është i RedBird”.
“Ka një hetim në vazhdim, faktet janë të thjeshta sepse pronësia është e RedBird. Autoritetet mund të hetojnë, ne kemi bashkëpunuar dhe jemi në dispozicion për çdo gjë”, shtoi CEO i Milan. Më pas Furlani përsëriti: “Ne mendojmë për punën tonë, që është të sigurohemi që Milan të jetë i suksesshëm dhe që tifozët tanë të jenë krenarë për klubin”.
Lexo më tej: Bastisje e Guardia di Finanza në selinë e Milan: në shenjestër kalimi i klubit nga Elliott te RedBird
Menaxheri i kuqezinjve, duke folur më parë për gazetarët, u ndal edhe te ndeshja e rëndësishme kundër Slavia Pragë: “Sonte është e rëndësishme, ne nuk e kemi fituar kurrë këtë kompeticion dhe do të donim të sillnim trofeun në shtëpi. Fillojmë nga 4-2, por në mendjen tonë duhet të pretendojmë se ndeshja fillon nga 0-0”.