Blake Lively bëri shaka me Kate Middleton pasi fotografia e saj në Ditën e Nënës në Mbretërinë e Bashkuar u hoq nga agjencitë e lajmeve më 10 mars për “editim”.
“Jam shumë e emocionuar për të ndarë këtë foto të re që sapo bëra sot”, shkroi aktorja e Gossip Girl në një foto në Instagram ku ajo kishte vendosur fytyrën e saj në trupin e një gruaje të shtrirë pranë një pishine, me një nga pijet e saj Betty Buzz në dorë. Në dukje duke u tallur me thashethemet për vendndodhjen e Kate, Blake shtoi në postimin e 15 marsit, “Tani e dini pse kam munguar”.
36-vjeçarja gjithashtu njoftoi se është duke punuar në katër produkte të reja për markën e saj të pijeve, duke përfshirë dy mocktails. Ndërkohë, llogaria e Betty Buzz shkroi nën foto, “Urrejtësit do të thonë se është photoshop”.
Veprimi i saj vjen pas teorive të konspiracionit rreth rikuperimit privat të Kate nga operacioni abdominal, të cilat u nxitën kur princesha rrëfeu se kishte redaktuar portretin e saj familjar.
“Si shumë fotografë amatorë, unë eksperimentoj herë pas here me editimin,” tha Kate në një deklaratë të postuar nga Kensington Palace më 11 mars. “Dëshiroj të shpreh falje për çdo konfuzion që shkaktoi fotografia familjare që shpërndamë dje.”
Ndërsa 42-vjeçarja nuk ka bërë asnjë dalje zyrtare publike gjatë gjithë vitit, ajo u pa nga paparacët duke u larguar nga Kështjella Windsor më 11 mars në një makinë me bashkëshortin Princ William, i cili po shkonte në një shërbim të Ditës së Komonuelthit./Lapsi.al