Në Wembley është një ndeshje që duhet shijuar, pastaj është edhe përcaktuese nëse do të mundemi akoma të shpresojmë për vendin e dytë. Anglia është një superfuqi e futbollit botëror, që nuk ka nevojë për epitetin finalist në Euro 2020 për tu përfaqësuar e megjithatë Shqipëria duhet ta mundë për të ëndërruar. Kjo e bën skuadrën e Rejas të mos ketë asgjë për të humbur dhe në gjithë strategjitë e ndërtuara në mendjen e teknikut italian prej një muaji, që nga humbja me Poloninë, kanë marrë formë idetë se si mund të surprizohen Tre Luanët. Me Berishën mes shtyllave e në mungesë të Gjimshitit, treshja e prapavijës është pothuaj e salduar me Ismajlin, Kumbullën e Veselin, i vetmi që luan vendin me një mes Mihajt e Dermakut. Sjellja e Hysajt e Trashit, që do të jenë lojtarët e krahut, pastaj, do të jetë më defensive se zakonisht, për të përballuar Sterling, Rashord apo kushdo vjen në ato anë. Bare e Gjasula janë të sigurtë në pozitat e tyre në qendër të mesfushës, ndërsa Laci e Bajrami diskutojnë për një fanellë titullari.
Për sulmin situata është më e qartë: fakti që Broja nuk u bashkua dot me ekipin e ul në pankinë, ndërsa Cikalleshi e Uzuni janë titullarët në Wembley, e konfirmuar kjo edhe nga tekniku i kombëtares Edoardo Reja në konferencën në shtyp në londër para ndeshjes: “Nuk mund të them se kush luan sot, jam mësuar t’ua them formacionin lojtarëve në ditën e ndeshjes. Dyshimet janë gjithmonë, por kemi punuar shumë mirë ndaj kam vështirësi zgjedhje, uroj dhe shpresoj që nesër të hedh në fushë ekipin më të mirë. Sa i përket Brojës, qëndroi këtu të kurohej për kaviljen, por sot e nesër do të shohim se si është, do të jetë në fushë apo jo. Nuk është titullar, por do të shohim gjendjen e tij”, shpjegoi Reja.
Ajo që i qendron Rejas ngulitur në kokë, si një ide fikse, është të sakrifikojë një nga mesfushorët, në këtë rast Lacin ose Bajramin, për të hedhur në fushë Roshin, që bashkë me Uzunin do të bëheshin sprinterët kuqezinj, në mbështetje të qendërsulmuesit, për të kapur në befasi mbrojtjen e ngadaltë angleze. Kjo është zgjidhja e vetme që torturon teknikun italian, nëse nuk do të votojë për sigurinë dhe mënyrën e zakonshme të lojës…
FORMACIONI I MUNDSHËM I SHQIPËRISË
Portier: BERISHA
Mbrojtës: ISMAJLI, KUMBULLA, VESELI (DERMAKU)
Mesfushorë: HYSAJ, BARE, GJASULA, BAJRAMI (LAÇI), TRASHI
Sulmues: CIKALLESHI, UZUNI