Akademia e Arteve dhe Shkencave të Filmit ka dënuar së fundmi veprimet e Will Smith gjatë Oscars dhe nisi një hetim për goditjen e tij me shuplakë ndaj prezantuesit Chris Rock.
Në një deklaratë të hënën, The AMPAS tha: “Akademia dënon veprimet e zotit Smith në shfaqjen e mbrëmshme. Ne kemi filluar zyrtarisht një shqyrtim zyrtar rreth incidentit dhe do të shqyrtojmë veprimet dhe pasojat e mëtejshme në përputhje me aktet nënligjore, standardet e sjelljes dhe ligjin e Kalifornisë.” Një mbledhje urgjente e bordit të guvernatorëve të Akademisë është thirrur për të mërkurën.Pasojat e mundshme për një sjellje të tillë përfshijnë përjashtimin, qortim publik ose privat dhe revokimin e çmimeve të Akademisë të fituara nga një shkelës.
Disa anëtarë të Akademisë, si shkrimtari-producent Marshall Herskovitz, kërkuan që akademia të marrë masa disiplinore kundër Smith. “Ai turpëroi gjithë komunitetin tonë sonte”, shkroi Herskovitz në Twitter. Ndërsa, Whoopi Goldberg, një anëtare e bordit të guvernatorëve deklaroi të hënën në The View: “Ne nuk do t’ia marrim Oscar. Do të ketë pasoja, jam e sigurt.”
Incidenti ndodhi pas batutës që komediani,Chris Rock bëri ndaj stilit të flokëve të Jada Pinkett e cila vuan nga alopecia.Menjëherë pas shakasë, Will u ngjit në skenë dhe goditi me shuplakë Chris. Ai filloi t’i bërtiste: “Mbaj emrin e gruas time larg nga goja jote e ndyrë”. Pasi fitoi cmimin si aktori më i mirë për rolin në “King Richard”, ai kërkoi falje publike të hënën për aktin e tij të dhunës ndaj Rock.
“Do të doja të të kërkoja falje publike, Chris”, shkroi Smith . “Gabova. Jam i turpëruar dhe veprimet e mia nuk ishin tregues i mashkullit që dua të jem. Nuk ka vend për dhunë në një botë dashurie dhe mirësie.”/Lapsi.al