Një natë për t’u harruar mes të mërkurës dhe të enjtes për Destiny Udogie. Anësori i majtë i Udineses u përplas me tavolinat e jashtme të një lokali në qendër të Udines, pasi humbi kontrollin e makinës së tij. 20-vjeçari, tashmë i shitur te Tottenham për 20 milionë euro, ka mbetur i huazuar te friulanët deri në fund të sezonit. Aksidenti i shkaktuar nga Udogie ka shkaktuar dëme për mijëra euro, sipas asaj që raporton Messaggero Veneto. Fatmirësisht, asnjë person nuk u përfshi në aksident dhe Udogie doli i padëmtuar nga përplasja.
Udogie iu nënshtrua kontrolleve të nevojshme nga karabinierët, të cilët mbërritën në vendngjarje rreth orës 3 të mëngjesit. Lojtarit i është bërë edhe testi i alkoolit, rezultatet e të cilit nuk dihen ende.
Lexo më tej: Video/ Udinese thyen 3-1 Milan mes polemikave: dy gola në 60″, Ibrahimovic bëhet më i vjetri shënues i Serie A
Pronari i lokalit rrëfeu skenën: “Një makinë goditi lokalin. U duk sikur shpërtheu një bombë. U shkatërruan 12 karrige, tre tavolina, dy çadra, pesë mbajtëse të mëdha bimësh dhe rreth dhjetë bimë. Vetëm një u shpëtua. Njëra nga çadrat e diellit përfundoi nën një makinë të parkuar, edhe kjo e goditur nga mjeti jashtë kontrollit”. Një vlerësim fillestar flet për të paktën 3000 euro dëme.