Ndeshja e katër radhazi pa humbje, ekzaktësisht që kur Dritan Mehmeti u kthye në pankinën e Dinamos, për të zëvendësuar Luigi Di Biaggio. 1-0 u imponua “nëndetësja” edhe ndaj Erzenit, duk u larguar tashmë nga fundi i renditjes, me pretendimin e lindur për një vend në Final Four. Vendosi një gol i shënuar nga Hoxha, në minutën e 74′, në goditjen e parë në portë të kryeqytetasve. Për Erzenin, i mirë për mbi një orë lojë, fatal ishte kartoni i kuq i Atanda.
Dy skuadrat ndaheshin nga vetëm një pikë, por renditja delikatee bënte ndeshjen shumë të rëndësishme. Të besuarit e teknikut Deliallisi, ndoshta vuajtën momentin e vështirë, në ndeshjen e 5 radhazi pa fitore. Dominimi në një orë loje, nuk prodhoi asnjë gol për shijakasit. Dinamo u mbajt gjallë vetëm falë performancës shumë të mirë të portierit Sali, që bllokoi cdo tentativë drejt portës. Nga anët e Hasanbellit, dinamovitët nuk është se u panë e madje aq u përpoqën të dukeshin.
Lexo më tej: Partizani me 9 lojtarë, Egnatia u ndal nga një super-Qirko: mbyllet me barazimin e fiksuar në 11 nëntor
U LARGUA ATANDA, SHËNOI HOXHA
Peshorja e ndeshjes ndryshoi kah vetëm në pjesën e dytë, kur në minutën e 64′ Atanda u ndëshkua me karton të kuq. Në një duel ajror, mbrojtësi goditi me taka Kaçorrin. Fillimisht gjyqtari i nxjorri kartonin e verdhë, por pasi kontrolloi imazhet në VAR, ndryshoi mendimin dhe e largoi nga fusha e lojës. E atëherë, Dinamo shënoi gol me goditjen e parë në portë. Në minutën e 74′ Hoxha shënoi golin që vendosi ndeshjen. Tre pikë të rëndësishme për Dinamon, që ngjitet në kuotën e 15 pikëve, duke kaluar për momentin Laçin në vendin e katërt. Rikthimi i teknikut Mehmeti po nxjerr nga kriza kryeqytetasit, edhe pse kjo performancës vështirë se mund ti ketë pëlqyer teknikut, me përjashtim të pikëve.