Kanadezi Shawn Barber, ish-kampioni i botës në kërcim me shkop, ëhstë ndarë nga jeta në moshën 29-vjeçare në shtëpinë e tij në Teksas. Lajmin e ka bërë të ditur menaxheri i ish-atletit. Në moshën 21 vjeçare, Shawn Barber fitoi titullin kampion bote në vitin 2015 në Pekin, duke kaluar 5.90 metra. Në të njëjtin vit ai fitoi kurorën tjetër të madhe ndërkombëtare në Lojërat Pan Amerikane në Toronto.
Përmes një mesazhi në Instagram, menaxheri i tij Paul Doyle ka njoftuar humbjen e sportistit kanadez, pa dhënë detaje mbi rrethanat e vdekjes së tij. “Një mik që nuk do ta harrojmë kurrë. Shawn Barber ka ndërruar jetë”, ka shkruar ai. Shawn, ende mbajtësi i rekordit kanadez në ambiente të mbyllura me 6 metra dhe jashtë me 5.93 metra, ishte gjithashtu një finalist olimpik në Rio 2016.
Sipas Associated Press, Barber kishte disa kohë që kishte probleme shëndetësore. Që nga viti 2020 ai e kishte braktisur atletikën, i pushtuar nga problemet psikologjike. I testuar pozitiv për kokainë në një test anti-doping, ai vetëm u paralajmërua sepse u pranua teoria e marrjes së pavullnetshme. Ai kishte puthur një person që kishte marrë drogën pak më parë. Në vitin 2017 ai doli hapur në rrjetet sociale: “Unë jam homoseksual dhe krenar për këtë. Prindërit e mi janë mbështetja ime më e madhe dhe më kanë ndihmuar shumë kohët e fundit. Dhe u them miqve të mi se do të jenë gjithmonë dhe se i dua fort”.