Trump thotë se do ta inkurajojë Rusinë të sulmojë anëtarët e NATO-s, që nuk paguajnë

Donald Trump ka thënë se do të “inkurajojë” Rusinë që të sulmojë çdo anëtar të NATO-s që nuk paguajë faturat si pjesë e aleancës ushtarake perëndimore.

Në një tubim të shtunën, ai tregoi një bisedë që kishte pasur me një lider të një vendi të madh europian se nuk do të mbronte një komb që kishte mbetur pas në pagesat e tij dhe se do të “inkurajonte” agresorët të “bënin çfarë dreqin të duan”.

Anëtarët e NATO-s angazhohen të mbrojnë çdo komb të bllokut që sulmohet. Shtëpia e Bardhë i quajti komentet “të tmerrshme dhe të pakontrolluara”.

Duke iu drejtuar mbështetësve të tij gjatë mitingut në Karolinën e Jugut, Trump tha se ai i kishte bërë komentet e tij për Rusinë gjatë një takimi të liderëve të vendeve të NATO-s.

Ai kujtoi se lideri i një “vendi të madh” kishte paraqitur një situatë hipotetike në të cilën ai nuk po përmbushte detyrimet e tij financiare brenda NATO-s dhe ishte sulmuar nga Moska.

Trump tha se lideri kishte pyetur nëse SHBA do t’i vinte në ndihmë vendit të tij në atë skenar?

“I thashë: “Nuk ke paguar? Je delikuent?”… “Jo nuk do të të mbroja, në fakt do t’i inkurajoja ata të bëjnë çfarë të duan. Duhet të paguash”.

Një zëdhënës i Shtëpisë së Bardhë tha se ish-presidenti po “inkurajonte pushtimet e aleatëve tanë më të afërt nga regjimet vrasëse” dhe i etiketoi komentet “të tmerrshme dhe të pamohueshme”.

Ai shtoi se deklarata “rrezikon sigurinë kombëtare amerikane, stabilitetin global dhe ekonominë tonë”.

Trump, është i favorizuar për të kandiduar sërish si kandidati republikan në zgjedhjet presidenciale të këtij viti në SHBA. Ai ka qenë prej kohësh kritik ndaj NATO-s dhe asaj që ai e sheh si një barrë të tepërt financiare për Shtetet e Bashkuara për të garantuar mbrojtjen e 30 vendeve të tjera.

Rusia nisi pushtimin e saj në shkallë të plotë të Ukrainës në vitin 2022, pasi zoti Trump u largua nga detyra. Që atëherë ai është ankuar për shumën e parave të SHBA-së të dërguara në Ukrainë, e cila nuk është anëtare e NATO-s.

Shtetet e Bashkuara i kanë ofruar Ukrainës më shumë mbështetje financiare se çdo vend tjetër – në total më shumë se 44 miliardë dollarë (34 miliardë £) që nga pushtimi i vitit 2022, sipas shifrave të Shtëpisë së Bardhë nga dhjetori.

Megjithatë, republikanët në Kongres që nga fundi i vitit kanë bllokuar të gjitha fondet e reja – duke kërkuar masa të ashpra për të kufizuar migrimin në SHBA në kufirin e saj jugor dhe më pas duke refuzuar projektligjin e ndryshuar kur ai u prezantua në fillim të kësaj jave.

Trump e festoi këtë refuzim gjatë tubimit të së shtunës, duke thënë se propozimet e bëra nga Presidenti Biden kishin qenë “katastrofike”.

Dy çështjet tani janë ndarë me sukses, që do të thotë se senatorët tani janë në gjendje të debatojnë veçmas për paratë e ndihmës.