Një problem i madh ka goditur teknikun e Real Madrid Carlo Ancelotti, që duhet të përballojë akuzat nga sistemi i drejtësisë spanjolle. Prokuroria Provinciale e Madridit kërkoi katër vjet e nëntë muaj burgim për mashtrim fiskal, pasi trajneri emilian dyshohet se nuk i ka paguar Thesarit një shumë prej 1,062,079 euro në vitet fiskale 2014 dhe 2015. Trajneri i Real Madrid dyshohet se e kishte lënë jashtë deklaratën tatimore të të ardhurave që rrjedhin nga shfrytëzimi i të drejtave të imazhit të tij, të cilat ai ua kishte transferuar subjekteve të tjera.
MBI 1 MILIONË EURO TË FSHEHURA
Akuza pretendon në denoncim se Ancelotti, i kapur nga lajmi ndërsa përgatitet për ndeshjen e Champions League kundër RB Leipzig, nënshkroi një kontratë pune si trajner i Real Madrid më 4 korrik 2013, deri më 30 qershor 2016. Ai ka “specifikuar në shpërblime për këtë periudhë, krahas performancës së punës, edhe të ardhurat që rrjedhin nga kalimi i të drejtave të imazhit në klub”. Duhet theksuar gjithashtu se që nga korriku 2013 tekniku italian filloi të punojë dhe banojë në Spanjë, duke krijuar si shtëpi e vendbanim të zakonshëm një pronë të vendosur në një shesh qendror në Madrid. Megjithatë, kur tekniku përfundoi “para kohe” marrëdhënien e tij me Real Madrid më 25 maj 2015, e dha me qira shtëpinë deri në tetor të atij viti, kështu që gjatë vitit 2015 “Spanja ishte qendra e tij kryesore e marrëdhënieve personale dhe interesave ekonomike”.
Lexo më tej: Champions, Ancelotti i tmerruar nga arbitrat: “Massa? Nuk do të doja të mendoja për të pas ndeshjes”
SISTEMI I PËRDORUR
Prokuroria nënvizon se “për të shmangur taksimin e të ardhurave që rrjedhin nga të drejtat e imazhit”, si ato të marra nga Real Madrid ashtu edhe nga markat e tjera me rastin e eventeve të ndryshme, trajneri iu drejtua një rrjeti “kompleks” dhe “konfuz” trust-esh dhe kompanish të regjistruara për të kanalizuar mbledhjen e të drejtave të imazhit. Ancelotti kishte “simuluar” transferimin e të drejtave të tij të imazhit te subjektet “pa aktivitet real” dhe kapacitet për shfrytëzim, me vendbanim jashtë Spanjës “duke zbuluar kështu paqartësitë para Thesarit spanjoll dhe fshehjen e përfituesit real të të ardhurave të të drejtave të tij të imazhit, në mënyrë që, as ai dhe asnjë nga kompanitë e përmendura, të mos paguante taksa për shumat e mëdha të marra në Spanjë apo jashtë vendit tonë”.