Epoka Igor Tudor ka nisur tashmë te Lazio. Pas dorëheqjes së Maurizio Sarri, trajneri i ri i bardhekaltërve mori zyrtarisht komandën e operacioneve në Formello. Ish-trajneri i Marseille vendosi të merrej menjëherë seriozisht duke rritur intensitetin e punës dhe duke përcaktuar një rrugëtim për t’i ndryshuar fytyrën skuadrës. Tudor fillimisht do të përdorë skemën 4-3-3 të preferuar nga Sarri, më pas synimi është të kalojë në 4-2-3-1 ose atë 3-4-2-1 që tashmë është bërë markë e formacioneve të tij.
Një skemë që në fakt nxjerr jashtë loje Elseid Hysaj, që edhe me Rejan në kombëtare e tregoi se nuk e bën dot krahun e mesfushës. Por nuk mbaron me keq. Për t’i dhënë një sinjal mjedisit dhe për të maksimizuar kohën në dispozicion, Tudor ka vendosur të fillojë menjëherë të transferojë udhëzimet e tij te lojtarët me seanca të dyfishta të planifikuara për sot e nesër. Kroati nuk i ka dhënë lojtarëve të gjithë fundjavën të lirë gjatë javës së pushimit për angazhimet e ekipeve kombëtare. Zgjedhje që sugjerojnë menjëherë një ndryshim të qartë drejtimi në të ardhmen e afërt dhe që mund të parashikojnë vendime të tjera të rëndësishme në fushë.
PLANI I TUDOR
Sipas Il Messaggero, me Tudor në krye, në Formello lojtarët do të startojnë të gjithë në kushte të barabarta dhe në hierarkitë e reja mund të jenë senatorët që rrezikojnë më shumë. Para së gjithash Ciro Immobile, tashmë nën vëzhgim pas largimit të teknikut Sarri dhe pa gol për shtatë ndeshje radhazi. Histori e ngjashme për Luis Alberto, i cili nuk ka qenë shumë i vazhdueshëm dhe vendimtar në paraqitjet e tij këtë sezon pavarësisht katër golave dhe gjashtë asisteve deri më tani. Për të dy, finalja e këtij sezoni do të jetë vendimtare për të përcaktuar rolin dhe të ardhmen e tyre në Romë. Sidomos nëse sirenat arabe dhe spanjolle do të tingëllonin sërish në qershor dhe do të lehtësonin çdo lamtumirë.