Juventus rigjen Dybalan për derbin kundër Torinos, por humbet Merih Demiral. Mbrojtësi turk ishte thirrur në ekipin kombëtar për kualifikueset e botërorit pavarësisht se ishte i dëmtuar, me shpresën se mund të rikuperohej për Turqi-Hollandë, por ai kurrë nuk luajti dhe, pasi u mbyll dritarja e kombëtares, doli që 23 vjeçari u testua pozitiv për Covid. Demiral është mirë, përveç disa simptomave të vogla, dhe duhet të kthehet në Itali me një fluturim mjekësor dhe, më pas, të qëndrojë i izoluar në Torino.
Tani për tani nuk ka asnjë komunikim nga Juventusi, duke qenë se lojtari nuk është me klubin për momentin, por problemi është i gjithi i Andrea Pirlos, i cili shpresonte që t’i kishte të gjithë në dispozicion pas pauzës për ekipet kombëtare. E në vend të kësaj, pas lajmit të skualifikimit të Buffon erdhi ai i pozitivitetit të Demiral, i cili me siguri do të humbasë derbin me Torinon, rikuperimin me Napolin të mërkurën e ardhshme dhe gjithashtu ndeshjen kundër Genoas.
Turku ishte i ndaluar që nga 11 marsi për shkak të një dëmtimi në rectus femoris në këmbën e djathtë dhe shpresonte të kthehej për derbin, por ende do të duhet të qëndrojë i ndaluar. Për fat të mirë për bardhezinjtë Bonucci, Chiellini dhe De Ligt janë në dispozicion.