Më 30 qershor Paulo Dybala dhe Juventus do të ndahen zyrtarisht: asnjë rinovim, e përfundimi i kontratës. Pas shtatë vjetësh, rrugët ndahen. Por cilën fanellë do të veshë numri 10 aktual i Juventusit? Joya, sipas rregullores, ka qenë tashmë i lirë të kontaktojë me skuadra të tjera prej dy muajsh dhe sigurisht që nuk kanë munguar kontaktet: Interi në Itali, Atletico dhe Barcelona në Spanjë, disa sondazhe nga Anglia, destinacioni ky i fundit që nuk preferohet – sipas asaj që mësohet – nga lojtari. E menjëherë sapo u mësua për mungesën e rinovimit mes menaxherit Jorge Antun dhe drejtuesve të Juventusit, nga Argjentina mbërriti lajmi për një takim tashmë të planifikuar për ditët e ardhshme me Interin.
Siç raporton Cesar Luis Merlo, gazetari i TYC Sports, i cili prej muajsh ndjek historinë e dështimit të marrëveshjes me Juventusin, tashmë në ditët në vijim do të ketë një takim mes Antun dhe Beppe Marotta, një admirues i madh i argjentinasit, njeriu që në vitin 2015 e bleu nga Palermo për ta çuar në Torino. Në planet e drejtuesve zikaltër ka vend për një kontratë të rëndë si ajo e Dybalas, përballë lamtumirës së Vidal dhe/ose Sanchez. Me pak fjalë, Joya do të trashëgonte një pagë prej më shumë se 7.5 milionë plus bonuse, një shifër jo shumë më e lartë se ajo që Juve tha se ishte gati ta paguante. Diferenca, në qëllimet e Marottas, megjithatë, do të ishte centralizimi absolut i lojtarit në projektin e ekipit: një Inter me pak fjalë, i ndërtuar mbi Dybalan që me Correan dhe Lautaron do të përbënte një sulm krejtësisht argjentinas.