Mason Mount, në kanalet zyrtare të Chelsea ka komentuar episodin e diskutueshëm të penalltisë dhe përjashtimit të Tomori. Një episod që në fakt vendosi ndeshjen në San Siro me Milan, për Champions League. “Natyrisht që është shoku im, e njoh Fik prej kohësh dhe më erdhi keq për të. Nuk mendoj se ishte karton i kuq. A ishte penallti? Ndoshta po – rrëfeu sulmuesi anglez -. Unë jam një lojtar i ndershëm. Doja të provoja të shënoja dhe ai më tërhoqi pak, por më vjen keq për atë vendim. Është e vështirë. E ndjeva se po përpiqej të më tërhiqte, por po shkoja drejt portës, kështu që nuk do të rrëzohesha dhe ndjeja se mund të kisha akoma mundësi për të shënuar. Kështu që vazhdova përpara, nuk shënova dhe pastaj sigurisht që gjyqtari fishkëlleu e dha penallti. Mbeta pak i befasuar në atë moment sepse e kalova dhe u përpoqa të shënoja. Ishte e vështirë ta shihja atë të përjashtuar”, tha Mount.
Vendimi i gjyqtarit Siebert prishi një mbrëmje të bukur futbolli dhe la një shije të keqe në gojën e Stefano Pioli dhe të gjithë kuqezinjve. Deklaratat e Mount pas ndeshjes vetëm konfirmojnë dyshimet për vendimin e arbitrit gjerman të ndeshjes. “Gjithmonë dëshiron të luash 11 me 11 kur janë këto lloj ndeshjesh. Kështu që ndoshta e ka prishur pak ndeshjen”, shtoi sulmuesi i Chelsea, Mount. “Ishte e rëndësishme për ne dhe sigurisht ne donim ta fitonim ndeshjen, gjë që ia dolëm. Por më vjen shumë keq për Tomori”.