Të pathyer prej 15 ndeshjesh, Brazili kërkon të përligj pretendimet: Serbia testi i parë i Selecaos në Katar

I konsideruar nga shumë si favoriti për të shkuar deri në fund në Kupën e Botës 2022 zbret në fushë edhe Brazili. Pesë herë kampionët e botës nisin fushatën e tyre të Grupit G kundër Serbisë në stadiumin Lusail. Të dy kombëtaret do të rinovojnë njohjet me njëri-tjetrin pasi përplasën “brirët” në fazën e grupeve katër vjet më parë, kur Selecao doli triumfues e Serbia u dorëzua 2-0.

BRAZILI

Brazili ka mbërritur në Katar si i vetmi komb në historinë e Kupës së Botës që është kualifikuar në çdo turne që nga edicioni i parë në vitin 1930. Pas një fushate kualifikuese rekord në CONMEBOL, me më shumë pikë (45) se kurrë më parë, Selecao fitoi 14 dhe barazoi tre nga 17 ndeshjet e tyre. Brazili rrallëherë ka vështirësi në kualifikuese dhe në fazën e grupeve gjatë viteve. Mbretërit e futbollit janë të pamposhtur në 15 ndeshjet e fundit të grupeve të Kupës së Botës, që nga humbja 2-1 ndaj Norvegjisë në vitin 1998.

Megjithatë, kanë kaluar 20 vjet që kur Brazili mori në dorë Kupën e tij të pestë Botërore në Seul. Presioni është i gjithi mbi skuadrën e talentuar të Tite, e renditur si numri një në botë nga FIFA. Brazilianët duhet të përmirësojnë daljen e tyre në çerekfinale kundër Belgjikës katër vite më parë. Serbia do të jetë kombëtarja e parë që do të vërë në provë kredencialet e Brazilit. Detyrë e vështirë kundër një Selecao që krenohet me një ecuri të pamposhtur prej 15 ndeshjesh në të gjitha garat. Ata kanë fituar shtatë takimet e fundit me një golavarazh 26-2. Brazili i ka fituar të dyja takimet e mëparshme kundër Serbisë pa pësuar asnjë gol. 1-0 ndaj rivalëve të Argjentinës në finalen e Copa America 2021, ishte hera e fundit që djemtë e Tite janë mundur në ndonjë kompeticion.

SERBIA

Serbia ka dështuar në fazën e grupeve në tre Kupat e Botës të mëparshme që nga fitimi i pavarësisë në vitin 1990. Tani ekziston një ndjenjë optimizmi se ata më në fund mund të arrijë në fazën me eliminim për herë të parë në Katar. Serbia, e renditur në vendin e 25-të në botë nga FIFA, impresionuan në kualifikueset e UEFA-s. Ata kryesuan grupin pasi fituan gjashtë dhe barazuan dy nga tetë ndeshjet e tyre. Skuadra e Dragan Stojkoviç më pas siguroi promovimin në Ligën A të Ligës së Kombeve, falë katër fitoreve dhe një barazimi nga gjashtë ndeshje. Humbja 1-0 kundër Norvegjisë në qershor është një nga vetëm dy humbjet e pësuar në 16 ndeshjet e tyre të fundit në të gjitha garat.

Lexo më tej: FOTO/ Brazili, pretendenti i parë, mbërrin i fundit: të gjitha Kombëtaret janë në Katar

Forma në tokën evropiane ka qenë mbresëlënëse, por transferimi i saj në skenën globale është detyra me të cilën përballen Stojkovic e të tjerët. Problemi është se ata nuk mund të fillonin fushatën e tyre të Kupës së Botës kundër një perspektive më të frikshme se pesë herë kampionët e botës, Brazili. Serbia ka humbur shtatë nga nëntë ndeshjet e saj në Kupën e Botës. Një shifër, më e larta se çdo kombëtare europiane dhe vetëm një më pak se rekordi i padëshiruar i Australisë prej tetë disfatash. Kështu, sot kërkohet një performancë e qëndrueshme nëse dëshirojnë të pretendojnë të paktën një barazim.