I izoluar në klinikë rehabilitimi. Për rreth njëzet ditë askush nuk do të mund ta vizitojë, madje as djali apo vëllezërit e tij, Diego dhe Valeria (të vetmit që kanë kontaktuar me të). Trajtimi që po i nënshtrohet Ezequiel Lavezzi ishte rigoroz, por ai vetë ishte i vetëdijshëm se nuk kishte zgjidhje tjetër. Madje i hoqën edhe mundësinë për të parë televizor. Herë pas here, por për një periudhë të shkurtër kohore, e lejojnë të përdorë celularin. E bëjnë që ai të thyejë rutinën e terapisë shumë të rëndë dhe të marrë pak shije nga bota reale në krahasim me izolimin që po përjeton.
Vetëm se në këtë rast ajo që pa dhe dëgjoi e bëri të tërbohet. Po të mundej, do të merrte numrin e transmetuesve për të ndërhyrë në programet që flasin për të dhe do të bërtiste gjithë mllefin për atë që thuhet për të. “Mediat janë m*t… – janë fjalët e gazetarit Matías Vázquez, shumë i afërt me familjen e ish-lojtarit të Napolit dhe PSG-së, i cili raportoi hidhërimin e Pocho ndaj TV –. Ata folën për therjen time me thikë në Punta del Este… pastaj për mbidozë”.
Lexo më tej: Avokati i Ezequiel Lavezzi: “Alkool e drogë? Jo, vuan nga hipomania, një shqetësim psikiatrik”
Lavezzi është i shtruar në një institucion psikiatrik në Buenos Aires, ai e ka lënë veten në duart e mjekëve të specializuar për ta ndihmuar atë të mposhtë demonët e tij. Ata demonë që e kanë pushtuar dhe e kanë shtyrë gjithnjë e më poshtë, derisa arriti në fund atë mbrëmje të furishme në Punta del Este. “Unë u përpoqa të pastrohesha në shtëpinë time, por nuk munda. Dhe kuptova se nuk mund të bëja asgjë tjetër përveçse të pranoja shtrimin në spital”.
CILI ËSHTË PROBLEMI I VËRTETË?
Thashethemet që shoqëruan atë episod, rrëfimi rreth jetës private të argjentinasit dhe shkaqet e krizës (mashtrimi i vuajtur nga ish-menaxheri kanë qenë shkatërrues si nga pikëpamja emocionale ashtu edhe nga ajo ekonomike), rrjedhja e informacionit mbi varësitë e supozuara (madje mediat folën edhe për “overdoza”) dhe manitë e persekutimit kanë ndërtuar momentin e vështirë që po kalon ish-futbollisti.
Problemi i vërtetë i Lavezzi – sipas asaj që ka nxjerrë në pah gazetari – është vetëm një: alkooli. Ky është shkaku që e ka tërhequr drejt shpërbërjes. “Është e vështirë, por duhet të punoj shumë, të kthej jetën time në rrugën e duhur dhe t’i bëj të gjitha këto për djalin tim”. Dashuria dhe as rrjeta e sigurisë së familjarëve të tij nuk i mjafton që të dalë nga vorbulla dhe të shërohet. Ai ka nevojë për heshtje absolute rreth tij dhe për të lidhur fijet me durim.