“Përfitohen shumë para duke fituar në Ligën e Kampionëve, por gjëja më e rëndësishme ishte të kalonim grupin si të parët duke fituar katër nga katër ndeshjet”. Kështu ka deklaruar Jurgen Klopp, tekniku i Liverpool, në mikrofonat e ‘Mediaset’ pas fitores ndaj Atletico Madridit, që i dorëzoi Reds kualifikimin matematikor dhe mbajti gjallë shpresat e Milan.
Në fakt, nëse italianët kanë ende një lloj shprese kjo vjen vetëm falë fitores së skuadrës nga Merseyside, por ndërkohë Klopp e ka bërë të qartë se nuk do të ketë asnjë neglizhencë nga angelzët pavarësisht arritjes së objektivit: “Tani duhet të shkojmë në Milano, në një stadium historik ku nuk kam qenë kurrë më parë dhe do të na duhet të lëmë përshtypje të mirë edhe atje”.