Nuk ishte kundërshtari i duhur Kukësi për të shpresuar një debutim të suksesshëm, jo vetëm sepse bëhet fjalë për një skuadër me ambicje të mëdha, por edhe ish-skuadra e teknikut debutues në pankinën e Kamzës, Ernest Gjoka. Blutë, që titullin e vetëm e kanë fituar me Gjokën në pankinë, i shkaktuan dëshpërim teknikut me 0-2 në javën e 14 të Superiores.
Në fakt, Kamza e ka humbur ndeshjen praktikisht vetë, me dy autogola në tre minuta, nga të cilat e gjithë Kamza e kishte të vështirë të merrte veten. Në minutën e 30 Frashëri në tentativë për të larguar topin e kthyer nga traversë, pas goditjes së Ethemit, e dërgoi në rrjetë, duke shkatërruar shpresën e vendasve për të përdorur kundërsulmin.
Sikur të mos mjaftonte, vetëm tre minuta më pas, Teqja bën të njëjtin veprim, nën presionin e Dzarias, duke mundur portierin Kirev, me një tjetër autogol, që mbylli lojën aty.
Të tilla situata kanë rrëzuar edhe skuadra më të kuotuara se Kamza, e madje me moral edhe më të shëndoshë. Një goditje e fortë për Gjokën, i mundur nga të tijtë, e me renditjen që vazhdon të jetë delikate, pavarësisht ndryshimit në pankinë, apo ardhjes së drejtorit të përgjithshëm, Cordella.
Kamza mbetet me 8 pikë në vendin e nëntë, pas 14 javësh kampionat, ndërkohë që Kukësi me 24 pikë në vendin e pestë ruan kontaktet me zonën europiane të renditjes.